لەکاتێکدا ئیسرائیل بەرەو هەڵبژاردنی گشتی هەنگاو دەنێت، دەرکەوتنی بەهێزی ڕەوتی ڕاستڕەوی توندڕەو و پێشوازیی بەشێک لە نەوەی نوێ لەم ڕەوتە، بووەتە یەکێک لە دیارترین دیاردەکانی ئەم خولەی بانگەشەی هەڵبژاردن.
ئاوێنە: ئیتامار بن گڤیر، وەزیری ئاسایشی نەتەوەیی ئیسرائیل کە سەرکردایەتیی ڕەوتێکی ڕاستڕەوی توندڕەو دەکات، نموونەیەکی دیاری ئەو گۆڕانکارییە سیاسییەیە. بن گڤیر کاتێک گەیشتە تەمەنی یاسایی بۆ دەنگدان و خزمەتی سەربازی، لەلایەن سوپای ئیسرائیلەوە بەهۆی توندڕەویی بیروبۆچوونە سیاسییەکانییەوە ڕەتکرایەوە و ڕێگەی پێنەدرا خزمەت بکات. بەڵام دوای تێپەڕبوونی سێ دەیە، لەکاتێکدا دیدگاکانی ئەو گۆڕانکارییەکی ئەوتۆیان بەسەردا نەهاتووە، کۆمەڵگە و سیستەمی سیاسیی ئیسرائیل گۆڕانکاریی ڕیشەیی بەخۆیەوە بینیوە؛ بەجۆرێک کەسایەتییەک کە پێشتر لەلایەن دامەزراوەی سیاسییەوە پەراوێز خرابوو، ئێستا لە بازنەی ناوەندیی بڕیار و ئەنجومەنی وەزیرانی حکومەتدا پێگەیەکی سەرەکی هەیە.
لە میانی هەڵمەتەکانی بانگەشەی هەڵبژاردندا، بن گڤیر بەردەوام لەناو ئاپۆڕای لایەنگرە گەنجەکانیدا دەردەکەوێت، کە بە جۆش و خرۆشەوە ئاڵای گەورەی پارتەکەی بەسەر سەری پاسەوانە زۆرەکانییەوە دەشەکێننەوە. لە سەردانێکی مەیدانیدا بۆ بازاڕی داخراوی شاری "ڕەملە"، کە شارێکی تێکەڵە لە دانیشتووانی جوو و عەرەبی ئیسرائیلی، بن گڤیر جەختی لەوە کردەوە کە پەیامی سەرەکیی ئەو بۆ دەنگدەرە گەنجەکان ئەوەیە بچنە سەر سندوقەکانی دەنگدان و بەشداری بکەن. ناوبراو لە لێدوانێکدا ڕایگەیاند: "ئێمە پاڵپشتییەکان دەبینین، خۆشەویستیی خەڵک دەبینین و دەمانەوێت لەم هەڵبژاردنەدا سەرکەوتن بەدەستبهێنین."
بەپێی ئامارەکان، لەم هەڵبژاردنەدا زیاتر لە نیو ملیۆن گەنج بۆ یەکەمجار مافی دەنگدانیان دەبێت. چاودێران و بەشێکی زۆر لە هاووڵاتییانی ئیسرائیل ئەم هەڵبژاردنە بە وێستگەیەکی چارەنووسساز بۆ داهاتووی ئاسایش و ناسنامەی دەوڵەتەکەیان دەزانن. ئەنجامی ڕاپرسییەکان ئاماژە بە کێبڕکێیەکی توند و نزیک لە یەک دەکەن، ئەمەش وایکردووە دەنگی ئەو گەنجانەی یەکەمجارە بەشداری دەکەن، ببێتە فاکتەری یەکلاکەرەوە لە دیاریکردنی ئەنجامی کۆتاییدا.
پشتبەست بە ڕاپرسییەک کە بۆ ڕۆژنامەی "یەدیعۆت ئەحرۆنۆت" (یەکێک لە پڕخوێنەرترین ڕۆژنامەکانی ئیسرائیل) ئەنجام دراوە، زیاتر لە ١٦%ی ئەو دەنگدەرە نوێیانە بەنیازن دەنگ بە پارتە ڕاستڕەوە توندڕەوەکان بدەن؛ کە ئەمەش یان لە ڕێگەی پاڵپشتیکردنی پارتی "هێزی جوو" بە سەرۆکایەتیی بن گڤیر دەبێت، یان پارتی "زایۆنیزمی ئایینی" کە لەلایەن بێزالیل سمۆتریچ، هاوپەیمانە ڕاستڕەوە توندڕەوەکەیەوە سەرکردایەتی دەکرێت.