عەلی سیستانی،
مەرجەعی باڵای شیعەكانی عێراق داوا دەكات سەرۆكی وەزیرانی نوێی عێراق لەكاتی
دیاریكراوی خۆیدا بەبێ دەستوەرداری دەرەكی دابنرێت.
ئاوێنە: ئەمڕۆ
هەینی، عەلی سیستانی لەبەیاننامەیەكدا كە لەلایەن نوێنەرەكەیەوە لە وتاری هەینیدا
لە كەربەلا خوێندرایەوە جارێكی دیكە ئیدانەی خوێنڕشتنی خۆپیشاندەران و هەروەها
زیانگەیاندنی بە ماڵوموڵكی تایبەت و گشتی كرد.
سیستانی داوای
لەوانە كرد كە بەهۆی خۆپیشاندانەكانەوە زیانیان لێكەوتەوە رێگەی یاسایی بگرنەبەر
بۆ وەرگرتنەوەی مافەكانیان و داواشی لە دەزگای دادوەری كردوە لێپێچینەوە لەگەڵ
هەمو ئەوانە بكات كە كاری تاوانیان ئەنجامداوە لە هەر لایەك بن.
مەرجەعی باڵای شیعەكانی عێراق هیواشی
خواستوە لەماوەی دیاریكراوی دەستوریدا سەرۆكی حكومەتی نوێ و ئەندامانی حكومەتەكە
دابنرێن بەجۆرێك كە خواستی هاوڵاتیان بێ و بەدور بێت لە دەستوەردانی دەرەكی.
جەختیشی كردۆتەوە كە مەرجەعیەت نابێتە
لایەن لە قسەكردن لەوبارەیەوە و بەهیچ شێوەیەكیش لەپرسی دانانی سەرۆكی نوێی
حكومەتدا رۆڵی نابێت.