ئا: وارهێل نێروەیی
"رۆژانە پروسەیا ڤەگەریانا خەلکێ شنگال و گوندێن دەوروبەرێن وێ یا بەردەوامە و هەر خێزانەکا ڤەگەریت ئێک ملیون و 500 هزار دینار ژلایێ بەغداڤە بۆ دهێنەدان."
رێڤه‌به‌ریا كوچ وكوچبه‌ران ل دهۆكێ ئاشکراکر هه‌ر ژ رۆژا 1/6/2020 زێدەتر ژ 650 خێزان ب فه‌رمێ مامەلەیێن خوه پێشكیشی مه كرینه چووینه شنگال و ئەڤ پروسیسا ڤەگەرینا بۆ شنگال یابەردەوامە.
ئه‌سكه‌نده‌ر محه‌مه‌د ئه‌مین، رێڤه‌به‌رێ كوچ وكوچبه‌ران ل دهۆكێ بۆ" ئاوێنە" راگەهاند: دگەل بۆرینا نێزیکی شەش سالا ل سەر کۆمکوژیا بسەرێ مللەتێ ئێزیدی هاتی ل شنگالێ ب دەستێت داعش و ئاوارە بوونا وان ل هەرێما کوردستانێ جارەکا دی خەلك ڤەدگەریە سەر جهـ و وارێن خوە. گوت ژی: بتنێ د هه‌یڤا دەرباز بویی دا هەتا نها زێدەتر ژ 650 خێزانێن ئاواره یێن چووینه شنگال و رۆژانە ئاواره معاملێن خوه پێشكیشی مه دكه‌ن.
دیارکرژی: هه‌ر ئاواره‌یەكێ ڤه‌گه‌ریته شنگال دوسیه‌یا ئاواریێ دهێته دائێخستن ل ناڤ كه‌مپێن ئاواران سنۆری پارێزگه‌ها دهۆكێ، هەروەسا هه‌ر ئاواره‌كێ ڤه‌گه‌رته شنگال دوسیه‌یا هاریكاریێ بۆ دهێته ڤه‌كرن ئه‌و ژی كوژمێ ملیۆنه‌ك و پێنچ سه‌د هزار دینارن ئه‌ڤ هاریكاریا ژلایێ به‌غدا ڤه دهێته دان.
ناڤهاتی زێدەتر گوت: رێكخراوه‌ك كوژمێ سێ سه‌د و بیست دولاری پیشكێش وان خێزانان دكه‌ت یێن ڤه‌دگه‌رنه شنگال و دوو رێكخراوان ژی به‌رهه‌ڤیا خوه نێشا دایه بچن ل شنگال هاریكاریا وان خێزانان بكه‌ن یێن ژ كه‌مپان زڤرنه سه‌ر جه و مالێن خوه.
خێزانەکا دخواست ڤەگەرن شنگالێ دیار کر: “پشتی رەوشەکا ب زەحمەت و زێدەتری پێنچ سالا مە ژیان دناڤ کەمپێ دا دیتی مە ژی بریار دا ئەم ڤەگەرن سەر جهـ و وارێن خوە ل شنگالێ و ژیانە مە ل شنگالێ چاوا دەرباسببێ باشترە ژ ژیانا ناڤ کەمپا”.
ل گورەیی زانیاریان پتریا ڤان ئاوارەیان ڤەگەریانە سەر جهـ و وارێن خوە خەلکێ گوندێت ل باشوورێ چایێ شنگالێ و سەنتەرێ باژارێ شنگالێ.
سالا 2014ێ تیرۆرستێن داعش هیرشی سه‌ر شنگال كر دئه‌نجامدا ژی پتر ژ 360 هزار كه‌س ئاواره بوون هه‌تا نوكه ژی پتریا ئاواران ناڤ كه‌مپ و خانێن هه‌یكه‌ل دا ماینه.
