تەریقەتی قادری کەسنەزانی داوا لە دەروێش و خەلیفەكانی لە ئێران دەكات پابەندی رێكارە تەندروستییەكان بن و لە ماڵی خۆیاندا پرسە بۆ كۆچی دوایی رێبەری كۆچكردوی تەریقەتەكە بگێڕن و رو لە هەرێمی كوردستان نەكەن.
ئاوێنە: تەریقەتی قادری كەسنەزانی لە نوسراوێكدا كە ئاڕاستەی دەروێش و خەلیفەكانی تەریقەتەكەی لە ئێران كردوە وتویەتی: تكامان وایە لەبەر رەوشی تەندروستی جیهان و ناوچەكە وا پێویست ئەكات كە هەمو پابەندی رێكارە تەندروستییەكان بین و هیوادارین هەر كەس لە ماڵی خۆی پرسە بگێڕێت و كەس بەرەو كوردستانی عێراق نەیەت تا خۆمان پەیامێكی ترتان ئاڕاستە دەكەین.
ئەوەش لەكاتێكدایە كە ئەمڕۆ هەزاران دەروێش و موریدی شێخ محەمەدی کەسنەزانی بە شمشێر، خەنجەر و تەورەوە لە ئێرانەوە سنوری دەروازەی نێودەوڵەتیی باشماخیان بەزاند بەمەبەستی ئەوەی لە سلێمانی بەشداری لە پرسەی رێبەرەکەیاندا بکەن و پشتیوانیی خۆیان بۆ شێخ نەهرۆ کەسنەزانی، جێگرەوەی رێبەرەکەیان دەرببڕن.
رۆژی 4ی تەمموزی 2020، شێخ محەممەدی شێخ عەبدولکەریم کەسنەزانی رێبەری تەریقەتی قادری لە تەمەنی 82 ساڵیدا لە ئەمریکا کۆچی دوایی کرد.