خەزعەلی: پرسی دەستگیركردنی كەسێكی سەربە حەشدی شەعبی چارەسەركرا
  2020-12-26       512       

قەیس خەزعەلی، ئەمینداری گشتی بزوتنەوەی عەسائیبی ئەهلی هەق رایگەیاند، پڕسی دەستگیركردنی كەسێكی سەربە حەشدی شەعبی كە بە "تۆمەتێكی فێڵاوی" دەستگیركرابو بە عەقڵ و حیكمەت چارەسەركرا.

ئاوێنە: لێدوانەكەی قەیس خەزعەلی، ئەمینداری گشتی بزوتنەوەی عەسائیبی ئەهلی هەق، ئاماژەیە بۆ سەركردەیەكی بزوتنەوەكەیان كە بە تۆمەتی تێوەگلان لە ئەنجامدانی هێرشی موشەكی بۆ سەر ناوچەی سەوز دەستگیركرابو.

قەیس خەزعەلی، ئەمڕۆ شەممە لە تویتێكدا، وتویەتی"ئەوەی رویدا لەدەستگیركردنی یەكێك لە كەسەكانی سەربە حەشدی شەعبی بە تۆمەتێكی فێڵاوی، بە عەقڵ و حیكمەت چارەسەركرا."

ئەمینداری گشتی بزوتنەوەی عەسائیبی ئەهلی هەق دوپاتیكردۆتەوە كە پابەنددەبن بە دەوڵەت و دامەزراوەكانییەوە لەگەڵ ئەوەش جەختی لە مافی بەرەنگاربونەوە(مقاومە) كردۆتەوە بۆ كۆتاییهێنان بە بونی هێزەكانی ئەمریكا لە عێراق.

هەروەها خەزعەلی جەختیشی لە پاراستنی شكۆی دەوڵەت و نەكردنە ئامانجی نێردە دیپلۆماتییەكان كردۆتەوە.

ئەو لێدوانانە دوای ئەوە دێن كە هەندێك چەكدار بەناوی عەسائیبی ئەهلی هەقەوە، شەوی رابردو هەڕەشەی روبەڕوبونەوەی حكومەتیان كرد ئەگەر ئەو سەركردەیەیان كە بە تۆمەتی تێوەگلان لە هێرشە موشەكییەكەی رۆژی یەكشەممەی رابردو دەستگیركراوە، ئازاد نەكرێت. ئەوەش پشێوی لە بەغدا دروست كرد.

لەبەرامبەردا مستەفا كازمی، سەرۆك وەزیرانی عێراق لە تویتێكدا وتی"ئاسایشی عێراق سپاردەیە لە گەردنمان، مل بۆ سەركێشی و هەنگاوی تاكلایەنە نادەین...داوای هێوركردنەوەمان كردوە بۆ پاراستنی وڵات لە سەركێشی تری بێهودە، بەڵام ئامادەی روبەڕوبونەوەین ئەگەر پێویست بكات."

هەر شەوی رابردو مستەفا كازمی هێزە ئەمنییەكان و خەڵكی لە شەقامەكانی بەغدا لەهەردو بەری كەرخ و رەسافە بەسەركردەوە.

ئەمڕۆش فەرماندەیی ئۆپەراسیۆنە هاوبەشەكانی سوپای عێراق دڵنیایی دا كە بەغدا ئارامەو هیچ هەڕەشەیەكی لەسەر نییەو هەوڵە هەواڵگرییەكانیشیان چڕكردونەتەوە بۆ شوێنپێهەڵگرتنی ئەنجامدەرانی هێرشە موشەكییەكان.

زۆرترین بینراو
© 2021 Awene Online, Inc. All Rights Reserved.
×