مەسعود بارزانی: ئەوەی لەسەر ئەرزی واقع كوردستانی لە هەڕەشەی داعش پاراست، پێشمەرگە بو
  2021-01-27       359       

مەسعود بارزانی، سەرۆكی پارتی رایگەیاند، پێشتر سوپاسی هاوپەیمانان و هەمو ئەو لایەنانەیان كردوە كە لە شەڕی داعشدا یارمەتی هێزی پێشمەرگەیان داوە، بەڵام دەشڵێت: هیچ كەس و لایەنێك ناتوانێ ئەو حەقیقەتە بشارێتەوە كە ئەفسانەی داعش لەسەر دەستی ڕۆڵە قارەمانەكانی گەلی كوردستان تێكشكا.

ئاوێنە: ئەو قسانەی مەسعود بارزانی، سەرۆكی پارتی، ئەمڕۆ چوارشەممە، لەپەیامێكدا دێن، دوای ئەوەی كە لەماوەی رابردودا لە میدیاكانی ئێران دو فیلم بڵاوكرانەوە كە تێیاندا باس لە داوای هاوكاریی مەسعود بارزانی لە قاسم سولەیمانی كراوە بۆ پاراستنی هەولێر لە هێرشی داعش، ئەوەش، بەپێی ناوەڕۆكی فیلمەكان، دوای ئەوەی ئەمریكاو هاوپەیمانان و سعودیە بەدەم هەمان داوای بارزانییەوە نەڕۆیشتون.

مەسعود بارزانی، لە پەیامەكەیدا وتویەتی"ماوەیەكە لەهەندێ ناوەندی ئیعلامی و سیاسی باسی شەڕی داعش دەكرێت. لێرەدا ڕاستییەك هەیە ناكرێ چاوپۆشی لێ بكرێ، داعش دیاردەیەكە كە دوژمنی سەرجەم مرۆڤایەتییەو، شەڕكردن لەگەڵ داعش شەڕێكی ئاسان نییە چونكە بەرەیەكی بەرفراوان و هەمەلایەنەو، لایەنێكیش بەتەنیا ناتوانێ داعش تێكبشكێنێت. ریشەكێشكردنی داعش هەماهەنگی و كاری هاوبەشی هەمو لایەك و كۆمەڵگەی نێودەوڵەتی پێویستە."

سەرۆكی پارتی وتویەتی"كاتی خۆی لە شەڕی داعشدا ئێمە سوپاسی هاوپەیمانان و ئەمەریكامان كرد كە یارمەتیی هێزی پێشمەرگەی كوردستانیان داوە. سوپاسی هەمو ئەو لایەنانەشمان كرد كە بەجۆرێك بەشداربونە لە شەڕی داعش و یارمەتیی پێشمەرگەیان داوە."

جەختیشی كردۆتەوە"لەگەڵ ئەوەشدا پێویستە هەمو لایەك ئەوە بزانن كە ئەوەی لەسەر ئەرزی واقعدا بە خوێن و قوربانیدانی خۆی، كوردستانی لە هەڕەشەی داعش پاراست، هێزی پێشمەرگەی كوردستان بو. هیچ كەس و لایەنێك ناتوانێ ئەو حەقیقەتە بشارێتەوە كە ئەفسانەی داعش لەسەر دەستی ڕۆڵە قارەمانەكانی گەلی كوردستان تێكشكا."

دەقی پەیامەكەی مەسعود بارزانی...

بەناوی خودای مەزن و دلۆڤان

ماوەیەكە لەهەندێ ناوەندی ئیعلامی و سیاسی باسی شەڕی داعش دەكرێت. لێرەدا ڕاستییەك هەیە ناكرێ چاوپۆشی لێ بكرێ، داعش دیاردەیەكە كە دوژمنی سەرجەم مرۆڤایەتییە و، شەڕكردن لەگەڵ داعش شەڕێكی ئاسان نییە چونكە بەرەیەكی بەرفراوان و هەمەلایەنەو، لایەنێكیش بەتەنیا ناتوانێ داعش تێكبشكێنێت. ریشەكێشكردنی داعش هەماهەنگی و كاری هاوبەشی هەمو لایەك و كۆمەڵگەی نێودەوڵەتی پێویستە.

كاتی خۆی لە شەڕی داعشدا ئێمە سوپاسی هاوپەیمانان و ئەمەریكامان كرد كە یارمەتیی هێزی پێشمەرگەی كوردستانیان داوە. سوپاسی هەمو ئەو لایەنانەشمان كرد كە بەجۆرێك بەشداربونە لە شەڕی داعش و یارمەتیی پێشمەرگەیان داوە. بەڵام لەگەڵ ئەوەشدا پێویستە هەمو لایەك ئەوە بزانن كە ئەوەی لەسەر ئەرزی واقعدا بە خوێن و قوربانیدانی خۆی، كوردستانی لە هەڕەشەی داعش پاراست، هێزی پێشمەرگەی كوردستان بو. هیچ كەس و لایەنێك ناتوانێ ئەو حەقیقەتە بشارێتەوە كە ئەفسانەی داعش لەسەر دەستی ڕۆڵە قارەمانەكانی گەلی كوردستان تێكشكا.

مەسعود بارزانی

27ـی كانونی دوەمی 2021

زۆرترین بینراو
© 2021 Awene Online, Inc. All Rights Reserved.
×