ته‌رمی ژن و پیاو و منداڵێك له‌ شه‌نگال دۆزرایه‌وه‌
  2021-04-10       321       

سه‌رچاوه‌یه‌ك ئه‌منی له‌ قه‌زای شه‌نگال رایگه‌یاند، گۆڕێكی به‌كۆمه‌ڵ له‌كاتی كاركردنی شۆفڵێكدا له‌باشوری شه‌نگال دۆزراوه‌ته‌وه‌ كه‌ ته‌رمی ژن و پیاو و منداڵێكی تێدایه‌.

ئاوێنه‌:  سه‌رچاوه‌یه‌كی ئه‌منی به‌ میدیاكانی عێراقی راگه‌یاند، له‌كاتی هه‌ڵكه‌ندنی شۆفڵێك له‌ناوچه‌ی سیپا شێخ خدری باشوری شاخی شه‌نگال، ته‌رمی ژن و پیاوێك و منداڵێك دۆزراونه‌ته‌وه‌، كه‌ پێده‌چێت له‌لایه‌ن چه‌كدارانی داعشه‌وه‌ له‌ ساڵی 2014 كوژرابن و له‌ناو گۆڕێكدا نێژرابن. 
 
ئه‌و سه‌رچاوه‌یه‌ ئاماژه‌ی به‌وه‌شكرد، لێكۆڵینه‌وه‌ سه‌ره‌تاییه‌كان له‌باره‌ی ته‌رمی ئه‌و سێ كه‌سه‌ ده‌ستیپێكردوه‌، ئاسه‌واری گوللـه‌ به‌جه‌سته‌یانه‌وه‌ بوه‌.

له‌ساڵی 2014 چه‌كدارانی رێكخراوی داعش هێرشیانكرده‌ سه‌ر پارێزگای نه‌ینه‌وا و شه‌نگال و ناوچه‌كانی ده‌وروبه‌ری و داگیریانكرد، سه‌ره‌ڕای كوشتنی چه‌ندین هاوڵاتی، ده‌ستیشیان به‌سه‌ر به‌شێكی زۆر له‌موڵك و ماڵی هاوڵاتیاندا گرت، دوای سێ ساڵیش سوپای عێراق له‌ ژماره‌یه‌ك ئۆپراسیۆنی تایبه‌تدا توانی ته‌واوی ناوچه‌كانی عێراق كۆنترۆڵ بكاته‌وه‌.
زۆرترین بینراو
© 2021 Awene Online, Inc. All Rights Reserved.
×