2021-04-13   785     
مهسعود بارزانی، سهرۆكی پارتی دیموكراتی كوردستان بەبۆنەی جەژنی سەری ساڵی ئایینی ئێزیدی (چارشەمبا سەرێ نیسانێ) پهیامێكی پیرۆزبایی ئاراستهكردو رایگهیاند، "وێڕای دەربڕینی نیگەرانیی خۆم لەچارەسەرنەبونی دۆخی شنگالو نەگەڕانەوەی ئاوارەكان، داواش لهخوشكو برایانی ئێزیدی دەكەم یەكڕیزیی ناوخۆییان بپارێزنو ڕێگە نەدەن دەنگی لابەلاو نامۆ زیان بەشوناسو مافو ئایینو داهاتویان بگەیێنێت".
ئاوێنه: دهقی پهیامهكهی مهسعود بارزانی
بەناوی خودای بەخشندە و میهرەبان
بەبۆنەی هاتنەوەی جەژنی سەری ساڵی ئایینی ئێزیدی، گەرمترین پیرۆزبایی خۆم ئاراستەی خوشك و برایانی ئێزیدی دەكەم و هیوادارم ئەم بۆنەیە دەستپێكێك بێت بۆ كۆتایهاتنی ئێش و ئازاری خوشك و برایانی ئێزیدی و لە ئارامی و ئاشتیدا جەژن و بۆنەكانیان بكەنەوە.
لێرەدا وێڕای دەربڕینی نیگەرانیی خۆم لە چارەسەرنەبوونی دۆخی شنگال و نەگەڕانەوەی ئاوارەكان، ئەوە دووپات دەكەمەوە كە بە تەواوەتی پاڵپشتی ماف و داواكاریی خوشك و برایانی ئێزیدیم و داواشیان لێ دەكەم یەكڕیزیی ناوخۆییان بپارێزن و ڕێگە نەدەن دەنگی لابەلا و نامۆ زیان بە شوناس و ماف و ئایین و داهاتوویان بگەیێنێت و پێویست دەكات هەموویان بە یەكگرتووییەەوە لەسەر ماف و داوا ڕەواكانیان پێداگر و مكوڕ بن.
بمێنن بە خێر و خۆشی
مسعود بارزانی
13ـی نیسانی 2021