2021-04-14 320
كۆنسوڵخانەی ئەمریكا لە ھەولێر رایدەگەیەنێت، بەخەمێكی قوڵەوە یادی شاڵاوی ئەنفال لەسەر ناوچەكانی كوردستان بەتایبەتی ناوچەكانی گەرمیان دەكەنەوە.
ئاوێنه: ئەمڕۆ چوارشەممە ١٤ی نیسانی ٢٠٢١، كۆنسوڵخانەی ئەمریكا لە ھەولێر لەساڵیادی شاڵای ئەنفالدا بڵاویكردووەتەوە:" بە خەمێكی قوڵەوە ئەمڕۆ ساڵیادی ھەڵمەتی ئەنفال دەكەینەوە كە لە لایەن ڕژێمی دیكتاتۆری سەدامەوە دژی گەلی كورد لە دەڤەری گەرمیان بە تایبەتی لە ناوچەكانی كەلار و چەمچەماڵ ئەنجامدرا."
ئەوەش روونكراوەتەوە:" ئەم ھەڵمەتە دڵتەزێنە بووە ھۆی كوشتنی ھەزارەھا كەسی بێتاوانی كورد لە پیاو و ژن و منداڵ و ھەروەھا بووە ھۆی برینداركردنی چەندین ھەزاری تر. بەردەوام ھاوشانی خەڵكی ھەرێمی كوردستان دەوەستینەوە بۆ دڵنیاییدان لە داھاتوویەكی تۆكمە و دیموكراتی و خاوەن ئابوریەكی گەشەسەندوو بۆ عيراق."
ئەمڕۆ ٣٣ ساڵ بەسەر كارەساتی ئەنفالدا تێپەڕ دەبێت كە بە ھەشت قۆناغدا تێپەڕی و قۆناغی یەكەم لە ٢٣ی شوبات تا ١٨ی ئاداری ١٩٨٨ بۆسەر ناوچەكانی دۆڵی جافایەتی دەستی پێكرد، قۆناغی دووەم ٢٢ی ئادار تا یەكی نیسانی ١٩٨٨ بۆ سەر ناوچەكانی قەرەداغ، قۆناغی سێیەم لە حەفتی نیسان تا ٢٠ی نیسانی ١٩٨٨ بۆ سەر ناوچەكانی گەرمیان، قۆناغی چوارەم لە سێی ئایار تا ١٥ی ئایار بۆسەر ناوچە قەڵاسێوكە و دۆڵی زێی بچووك، قۆناغی پێنج و شەش و حەفت لە ١٥ی ئایار تا ٢٦ی ئاب بۆ سەر ناوچەكانی شەقڵاوە و رواندز و قۆناغی ھەشتەم وكۆتایی لە ٢٦ی ئاب تا شەشی ئەیلوولی ١٩٨٨بۆ سەر ناوچەی بادینان و سەرجەم ئەم قۆناغانەش دوای رووخاندنی ھەموو گوندەكانی كوردستان لە بەرواری شەشی ئەیلوولی ١٩٨٨ بە فەرمیی كۆتایی پێھات.