2021-04-15 418
پەرلەمانتارێکى فراکسیۆنى پارتى لە پەرلەمانى عێراق پێشبینیدەکات بەمنزیکانە بەغدا بەشە بودجەى هەرێم رەوانە بکات، بەپێی یاساى بودجە.
ئاوێنه: مەیادە نەجار ئەمڕۆ پێنج شەممە لە چاوپێکەوتنێکدا لەگەڵ تەلەفزیۆنى فەرمى حزبەکەى ئاماژەى بەوەکرد، تا ئێستا هیچ کێشەیەک نییە بۆ جێبەجێکرنى یاساى بودجە، بەم نزیکانە یاساکە جێبەجێدەکرێت و پشکى هەرێمیش دەنێردرێت.
وتیشى "بەپێی یاساى بودجە بەغدا بەتەواوى دانییناوە بە دۆسیەى نەوت گازى هەرێم و لەمەودوا ناتوانن بیانوى پێ بگێڕن".
مەیادە نەجار باسى لەوەشکرد، لیژنەیەکى هاوبەشى هەرێم و بەغدا پرسە هونەرییەکانى تایبەت بە جێبەجێکردنى بودجە چارەسەر دەکەن.
رۆژى چوارشەممە 31 ى ئازارى 2021 پەرلەمانى عێراق پڕۆژەى بودجەى عێراقى پەسەندکرد، دواتریش سەرۆکایەتى کۆمار پەسەندیکرد، بەڵام تا ئێستا نەچووەتە بوارى جێبەجێکردنەوە.
بەپێی یاساى بودجە، پشکى هەرێم بە نزیکەى 12 ترلیۆن دینار دیاریکراوە، لەبەرانبەر رادەستکردنى داهاتى 250 هەزار بەرمیل نەوتى رۆژانە و نیوەى داهاتە فیدراڵییەکان، بەڵام هیچ میکانیزمێک بۆ دیاریکردنى ئەو پابەندییانە دیارینەکراوە.
تا ئێستا دیار نییە لە رێنماییەکانى جیبەجێکردنى یاساى بودجەدا کە هەرێم داوایکردووە بەشداربێت لە داڕشتنیدا، چى میکانیزمێک دادەنرێت بۆ دیاریکردنى پابەندییەکان.
بەهۆى دیارینەکردنى هیچ میکانیزمێکەوە، تا ئێستا بەتەواوى نازانرێت بەغدا چەندێک پارە رەوانەى هەرێم دەکات، بەو هۆیەشەوە بەرپرسانى هەرێم جەختدەکەنەوە کە بەرچاویان روون نییە و نازانن داهاتى مانگانەیان چى گۆڕانکارییەکى بەسەردا دێت.