وەزارەتی تەندروستی عێراق رایگەیاند، لەماوەی 24 سەعاتی رابردودا 38 توشبوی كۆرۆنا گیانیان لەدەستداوەو هاوكات هەشت هەزارو 696 حاڵەتی نوێی توشبون بە ڤایرۆسەكە تۆماركراون و بەوەش كۆی گشتی ژمارەی توشبوان لەعێراق یەك ملیۆن كەسی تێپەڕاندوە.

ئاوێنە: وەزارەتی تەندروستی عێراق، ئێوارەی ئەمڕۆ چوارشەممە، لە بەیاننامەیەكدا ئاشكرایكرد: لەماوەی 24 سەعاتی رابردودا، 47 هەزارو 523 پشكنینی كۆرۆنا لەسەرتاسەری وڵات ئەنجامدراون و بەپێی ئەنجامەكان هەشت هەزارو 696 كەسی دیكە توشی كۆرۆنا بون و بەوەش كۆی گشتی ژمارەی توشبوان لە عێراق یەك ملیۆن كەسی تێپەڕاندوە.

بەپێی بەیاننامەكە هەر لەماوەی 24 سەعاتی رابردودا ژمارەی ئەو توشبوانەی لە ڤایرۆسەكە چاكبونەتەوە كەمتر بون لەوانەی توشی كۆرۆنا بون بەشێوەیەك كە شەش هەزارو 382 توشبوی كۆرۆنا چاكبونەتەوە.

هەروەها ئاماژەی بەوەشداوە كە هەر لە ماوەی 24 سەعاتی رابردودا 38 توشبوی ڤایرۆسەكە گیانیان لەدەستداوە كە 15 حاڵەتیان لە هەرێمی كوردستان تۆماركراون.

وەزارەتی تەندروستی عێراق لە بەیاننامەكەیدا هێمای بۆ ئەوە كردوە كە بە تۆماركردنی ئەم حاڵەتە نوێیانە، كۆی توشبون بە كۆرۆنا گەیشتۆتە یەك ملیۆن و هەزارو 854 كەس لەوانە 15 هەزارو 98 كەسیان گیانیان لەدەستداوەو 877 هەزارو 309 كەسیان چاكبونەتەوەو 109 هەزارو 447 كەسیشیان لەژێر چارەسەردان كە لەوانە 517 توشبویان لەژێر چاودێری چڕدان.