وەزارەتی پێشمەرگە، هۆكاری پەلامارەكەی شەوی رابردوی داعش بۆ سەر هێزەكانی پێشمەرگە بۆ بونی ئەو بۆشاییە ئەمنییە دەگەڕێنێتەوە كە لەنێوان پێشمەرگەو سوپای عێراقدا هەیەو جەختیشدەکاتەوە كە "ئەو ناوچانە پێویستیان بەهێزی هاوبەش و هاوکاری و هەماهەنگی گشتگیرو هەمەلایەن هەیە لەگەڵ سوپای عێراقدا."

ئاوێنە: وەزارەتی پێشمەرگە، ئەمڕۆ شەممە، لە راگەیەندراوێكدا وتی"لەئەنجامی بونی بۆشایی ئەمنی لەنێوان هێزی پێشمەرگەی کوردستان و سوپای عێراقی، تیرۆریستانی داعش پەلاماری سەنگەرێکی لیوای 10ی پیادەیان دا لەبەرزاییەکانی (زورگەزراو) لەسنوری میحوەری پێنج. پەلامارەکە لەلایەن هێزەکانی پێشمەرگەوە، بەرپەرچ  درایەوەو تیرۆریستان راونران."

وەزارەتەكە ئەوەشی خستۆتەڕو"پێشتر چەندین جار هۆشداریمان دابو، لەبارەی مەترسییەکانی تیرۆریستان لەو ناوچانەی کە بۆشایی ئەمنیان تێدایە. بەداخەوە، هۆکاری ئەو هەلقۆستنەوەیەی تیرۆریستان، بونی ئەو بۆشاییە ئەمنییەیە کە لەنێوان هێزی پێشمەرگەو سوپای عێراقدا هەیە."

وەزارەتی پێشمەرگە جەختیشی كردۆتەوە کە ئەو ناوچانە پێویستیان بەهێزی هاوبەش و هاوکاری و هەماهەنگی گشتگیرو هەمەلایەن هەیە لەگەڵ سوپای عێراقدا.

دەقی راگەیەندراوەكە...

راگەیەندراوێک لەوەزارەتی پێشمەرگەوە

لەئەنجامی بونی بۆشایی ئەمنی لەنێوان هێزی پێشمەرگەی کوردستان و سوپای عێراقی، تیرۆریستانی داعش پەلاماری سەنگەرێکی لیوای 10ی پیادەیان دا لەبەرزاییەکانی (زورگەزراو) لەسنوری میحوەری پێنج. پەلامارەکە لەلایەن هێزەکانی پێشمەرگەوە، بەرپەرچ  درایەوەو تیرۆریستان راونران.

لێرەوە رایدەگەیەنین، هێزی پێشمەرگەی کوردستان هەمیشە سازو ئامادەیە، ئەو کردەوە دڕندانەیەی تیرۆریستان خەڵکی کوردستان و سەقامگیری و ئارامی و ئاسایشی هەرێم و ناوچەکە ناشێوێنێت.

پێشتر چەندین جار هۆشداریمان دابو، لەبارەی مەترسییەکانی تیرۆریستان لەو ناوچانەی کە بۆشایی ئەمنیان تێدایە. بەداخەوە، هۆکاری ئەو هەلقۆستنەوەیەی تیرۆریستان، بونی ئەو بۆشاییە ئەمنییەیە کە لەنێوان هێزی پێشمەرگەو سوپای عێراقدا هەیە، بۆ ئەمەش جەختدەکەینەوە کە ئەو ناوچانە پێویستیان بەهێزی هاوبەش و هاوکاری و هەماهەنگی گشتگیرو هەمەلایەن هەیە لەگەڵ سوپای عێراقدا.

بەتیرۆریستان رادەگەیەنین، هێزی پێشمەرگەی کوردستان وەڵامی توندی  دەبێت بۆ ئەو هێرشە چەپەڵانەیان و دڵنیایش دەدەین بەخەڵکی کوردستان، کە ئاسایشی هەرێمی کوردستان، وەک هەمیشە پارێزراو دەبێت.

پرسەو سەرەخۆشی لەخانەوادەی شەهیدانی سەنگەری بەرگری نیشتمان دەکەین و سەلامەتی و شیفای خێراش بۆ برینداران.

وەزارەتی پێشمەرگەی حکومەتی هەرێمی کوردستان
1ی ئایاری 2021