بەشار ئەسەد، سەرۆكی سوریا بە بەدەستهێنانی لەسەدا 95.1ی دەنگەكان، بۆ جاری چوارەم بە سەرۆكی ئەو وڵاتە هەڵبژێردرایەوە، ئەوەش بەپێی ئەنجامە رەسمییەكانی هەڵبژاردن كە ئەمشەو پێنجشەممە، لەلایەن حەمودە سەباغ، سەرۆكی پەرلەمانی سوریاوە راگەیەندرا.
ئاوێنە: حەمودە سەباغ، كەمێك لەمەوبەر لە كۆنگرەیەكی رۆژنامەوانیدا رایگەیاند، بەشار ئەسەد، لە هەڵبژاردنەكەدا 13 ملیۆن 540 هەزار دەنگی دەنگدەرانی بەدەستهێناوە.
بەپێی قسەی حەمودە سەباغ، لە هەڵبژاردنەكەدا زیاتر لە 14 ملیۆن هاوڵاتی سوریا دەنگیان داوە.
دەستوری سوریا ماوەی هەر خولێكی سەرۆكایەتی بە حەوت ساڵ دیاریكردوە.
بەپێی قسەی بەرپرسانی سوریا، لە هەڵبژاردنەكەدا 18 ملیۆن و 107 هەزار هاوڵاتی سوری لە ناوخۆ و دەرەوەی ئەو وڵاتە مافی دەنگدانیان هەبوە.
بەشار ئەسەد، لەدوایین هەڵبژاردندا كە ساڵی 2014 بەڕێوەچو بە بەدەستهێنانی لەسەدا 88.7ی دەنگەكان بە سەرۆكی ئەو وڵاتە هەڵبژێردرابوەوە.