دوێنێ هەینی، لە ناحیەی "یەسرب"ی سەربە پارێزگای سەڵاحەدین
"هێرشێكی تیرۆریستی" كرایە سەر پرسەیەك و لە ئەنجامدان دەیان كەس كوژران
و برینداربون.
ئاوێنە: شانەی راگەیاندنی ئەمنی عێراق لە بارەی هێرشەكەوە لە
بەیاننامەیەكدا وتویەتی، لەناوچەی "بوجەیل"ی سەربە ناحیەی یەسرب لە
پارێزگای سەڵاحەدین، "هێرشێكی تیرۆریستی" كراوەتە سەر یەكێك لە پرسەكان
و لە ئاكامدا ژمارەیەك كەس بونەتە قوربانی.
هەرچەندە شانەی راگەیاندنی ئەمنی ژمارەی قوربانییەكانی ئاشكرانەكردوە،
بەڵام میدیا عێراقییەكان ئاماژەیان بەوەداوە كە لە هێرشەكەدا 13 كەس كوژراون و
زیاتر لە 18 كەسی دیكەش برینداربون.
هەروەها بەپێی میدیا عێراقییەكان سیان لە كوژراوانی هێرشەكە لە هێزە
ئەمنییەكانن و 10یان هاوڵاتی مەدەنین و برینی هەندێك لە بریندارەكانیش سەختە.
شانەی راگەیاندنی ئەمنی عێراق، لە بەیاننامەیەكدا ئاماژەی بەوەداوە كە
ئەمڕۆ شەممە وەفدێكی ئەمنی سەردانی ناحیەی یەسرب-یان كردوە بەمەبەستی لێكۆڵینەوە
لەوردەكارییەكانی هێرشەكە.