پێشنیوەڕۆی ئەمڕۆ هەینی رێوڕەسمی پرسەی زەکی چەلەبی، خاوەن ریستۆرانتی دەنیز كە لە شەقامی بەختیاری شاری سلێمانی تەقەی لێكراو دواتر لە نەخۆشخانە گیانی لەدەستدا، دەسیتپێکرد. دو پەرلەمانتاری هەدەپە لە پرسەكەیدا رایانگەیاند: كوشتنی كوردان لەناو خاكی خۆیان قبوڵكراو نییە.

ئاوێنە: وەفدێكی هەدەپە كە بۆ بەشداری لە پرسەكە هاتونەتە سلێمانی و پێكدێن لە دو پەرلەمانتار بەناوەكانی موعەزەز ئۆرهان، پەرلەمانتاری وان و ئیمام تاشچیئەر، پەرلەمانتاری ئامەد، ئەوان لەمیانی بەشدارییان لە پرسەكە، لەكۆنگرەیەكی رۆژنامەوانیدا رایانگەیاند، کوشتنی زەکی چەلەبی شەرمەزار دەکەن و وتیشیان، "ئێمە قبوڵناکەین کورد لە ناو ماڵی خۆیدا بکوژرێت."

موعەزەز ئۆرهان، پەرلەمانتاری هەدەپەی شاری وان وتی: ئێمە وەک هەدەپە تا کۆتایی لەسەر خەت دەبین و چاودێریی ئەو کەیسە دەکەین، تا ئەوکاتەی بکوژان دەدۆزرێنەوە و بەسزای خۆیان دەگەن، سەرەخۆشیی لە بنەماڵەکەی و هەمو گەلی کورد دەکەین.

هاوکات ئیمام تاشچیئەر، پەرلەمانتاری ئامەد وتی: هەرچوارپارچەی کوردستان بۆ ئێمە یەکە و وەک ماڵی خۆمان تەماشای دەکەین، ئەمڕۆ گەلی ئێمە لە باکوریش زۆر توڕەو نیگەرانن لەم ڕوداوە، داواکاری ئێمەو هەمو گەلیش ئەوەیە، کە بکوژان ئاشکرابکرێن و لە دادگادا سزا بدرێن، بۆ ئەو مەبەستەش ئێمە زنجیرەیەک دیدار و کۆبونەوە لەگەڵ لایەنە پەیوەندیدارەکان ئەنجامدەدەین و دواتر ڕاپۆرتێکی لەسەر ئامادە دەکەین.