وەزیرەکەی سەدر نوێترین پەیامی بڵاوکردەوە و تێیدا کوتلەی سادیقون بە “کوتلەی درۆزنەکان” ناودەبات و دەشڵێت، “ئەوە ئێمە بووین شەش وەزیرمان لەسەر دۆسیەی گەندەڵی دوورخستەوە”.

ئاوێنه‌: لە نوێترین پەیامیدا کە لە تویتەر بڵاویکردووەتەوە ساڵح محەمەد عێراقی ئاماژە بەوە دەکات، “کوتلەی درۆزنەکان دەڵێن ڕەوتی سەدر دەبێت بەرپرسیارێتی ئەوە هەڵبگرێت کە لە حکومەتەکانی پێشوودا ئامادەیی هەبووە” وەڵام: بەڵێ، بەرپرسیارێتی هەڵدەگرین و نکوڵی لێناکەین، ئێمە لە پڕۆسەی سیاسیدا وەک عەلی بن یەقتین بووین، بەڵام سودی نەبوو لەگەڵتان، چونکە ئێوە سوورن لەسەر گەندەڵی.

دەشڵێت، لە هەمان کاتیشدا بەرپرسیارێتی ناگرینە ئەستۆ لەبەر ئەم هۆکارانە:

یەکەم/ لەسەر ئەو ڕێککەوتنە ئەمنییە شەرمەزارکەرە ڕێکنەکەوتین.

دووەم/ بەرەنگاری داگیرکەر بووینەوە کە یەکێکە لە گرنگترین هۆکارەکانی گەندەڵیتان.

سێیەم/ لەکاتی خۆیدا بەشداری ئەنجومەنی حکوممان نەکرد، سەرباری ئەوەی ئێوە لەو کاتەدا سوور بوون لەسەر ئەوەی بەشداری بکەن.

چوارەم/ شەش وەزیرمان بەهۆی گەندەڵی دوورخستەوە.

پێنجەم/ لێپێچینەوەمان لەگەڵ گەندەڵکاران و ئەوانەی گومانی گەندەڵییان لەسەر بوو کرد، ئەمەتان ڕەتکردەوە و گەندەڵەکان هاتنە پاڵتان.

شەشەم/ “کوتلەی درۆزنەکان”.. ئێمە دژی گەندەڵی وەستاوینەتەوە، ئەگەر وا نەبووایە ئێوە لە ڕەوتی سەدر دەرنەدەکران.

حەوتەم/ لەگەڵ داگیرکەدا دانوستانمان نەکرد بۆ ئەوەی لە زیندانەکان دەرباز بین وەک ئەوەی ئێوە کردتان.

هەشتەم/ هەر ناکۆکییەکتان لەنێوانمان هەڵگیرساند، خێرا سەرکردەکەمان هەستا بە هێورکردنەوەی.

نۆیەم/ شوێنکەوتوویی گەورەترین هۆکاری گەندەڵییە، بەڵام سەرگەورەکەتان دەڵێت، “شوێنکەوتووییمان نهێنی سەرکەوتنمانە.

دەیەم/ هێرشمان نەکردەسەر پاڵاوتگەی بێجی.

یانزەیەم/ سەرگەورەتان دەڵێت، “ئەگەر لێپێچینەوە لە گەندەڵکاران بکرایە ئێستا زیندانەکان پڕ بووبوون”، ئەمەش واتە لێپێچینەوەیان لێناکرێت.

دوانزەیەم/ وازمان لە بەشداریکردن لە هەڵبژاردن هێنا.

سیانزەیەم/ 73 ئەنداممان لە پەرلەمان کشاندەوە تا لەگەڵ گەندەڵییەکانتان ڕێکنەکەون.

چواردەیەم/ ئەندامانی حەشدی شەعبی بۆ پڕکردنەوەی حەزەکانتان بەکاردەهێنن، لەکاتێکدا ئێمە دەمانەوێت خوێن و ناویان بپارێزین.