بۆ کوردەکان، لە بابەتی بەکارهێنانی کێشەی کورد، بۆ بەرژەوەندییەکانی خۆیان، جیاوازییەکی ڕاستەقینە لە نێوان تورکیا و ئیسرائیل نییە. هەردووکیان کوردیان وەک کارتێکی سیاسی بەکارهێناوە کەهەرکاتێک بەرژەوەندییە ستراتیژییەکانیان پێویست بکات، دەیخەنە گەڕ.
ئیسرائیل لەهەندێک قۆناغدا بەنافەرمی و لەڕاگەیاندنەكاندا، پشتگیریی کوردی کردووە، بەڵام ئەوەی پرسیارەکەیە: ئایە ئیسرائیل لەڕاستیدا، چی بۆگەیشتن بەئازادیی درێژخایەن، و مافی چارەی خۆنویسین بۆ گەلی کورد کردووە؟ زۆر كەم نەبێت تەنها ئەوکاتە باسی كورد دەكات، کەبۆ سیاسەتی و بەرژەوەندیی وڵاتەكەی خۆی یاری پێبكات.
تەنانەت لەم دوایانەدا كەئیسرائیل، پشتگیریی هەندێک کەمینەی وەک دروزی کردووە لەسوریا، بەڵام هەڵوێستی لە بەرامبەر کوردەکان جیاواز بوو، تەنها تەماشەكەرو سەوداكەری پلان و هێرشی ملیشاكانی حوكمەتی سوریا بوو،بۆسەر ڕۆژئاوای كوردستان. بۆیە كاتێك بارودۆخی ناوچەکە دەگۆڕێت، بەرژەوەندییەکانی کورد، بەئاسانی دەتوانرێت ببێتە قوربانیی بەرژەوەندییە ستراتیژییەکانی دیكەی دەوڵەتەكان. مێژووی ١٠٠ ساڵی ڕابردوو نیشانی داوە، کەکوردەکان بەردەوام لەلایەن هێزە گەورەکانەوە بەکارهێنراون و دواتر، کاتێک بەرژەوەندییەکانیان لەگەڵ کورد یەکسان نەماوە، بەجێهێڵراون.
ئێمە وەک کورد، پێویستمان بە گوێگرتن لەووتار و وانەی ئازادیی و، دیموکراسی و مافی مرۆڤ نییە، لەلایەن ئەو حکومەتانەی کەبەردەوام پرسی کوردیان وەک ئامرازێک لەسیاسەتی ناوچەیی بەکارهێناوە. کوردەکان مێژووی خۆیان دەزانن. دەزانین چی بەسەرمان هاتووە، بۆ چی شەڕمان کردووە و چەندین قوربانییمان داوە بۆ ئازادی و خاك و كەرامەتی خۆمان.
گەلی کورد، لەلایەن ئیسرائیل، ئەمریکا و وڵاتانی ئەورووپاوە، وەك كارتێك لەیارییە سیاسییەکانی ڕۆژهەڵاتی ناوەڕاست، کراوەتە ئامراز. زۆرجار هێزە گەورەکان، بۆبەرژەوەندییە ستراتیژییەکانی خۆیان كەمێك پشتگیری كوردیان كردووە، هەرلەڕاماڵینی دەسەڵاتی بەعس لەعێڕاق، تا شەڕی دژ بەداعش و لەسوریا، لەکاتێکدا كوردو خەڵکی ئاسایی بەخوێنی خۆیان لەناوچەكانیان جەنگاون، بەڵام لەكۆتایداو چەند بارە، خراونەتە نێو دونیای سیاسەت و سەودای زلهێزەكان و ئەو نەخشەیەی ئەوان دەیكێشنەوە.
کاتێک کەسانێک دەڵێن کورد و جولەکە دەبێت هەردووکیان وڵاتی خۆیان هەبێت، پرسیارەکە سادەیە: ئیسرائیل لەڕاستیدا چی کردووە بۆ پشتگیری لەمافی کورد بۆ دیاریکردنی چارەنووسی خۆی؟ تەنها قسە بەس نییە. کورد پێویستی بەپشتگیریی ڕاستەقینەو مەیدانی و ماددی و پڕۆتۆكۆڵی نێودەوڵەتی بەردەوام هەیە، بۆ مافەکانی، نەک پشتگیرییەکی سیاسی لەڕاگەیاندنەكان کەتەنها کاتێک باس دەكرێت، بەرژەوەندیی ئیسڕائیل و ئەمەریكا پێویستی پێی هەبێت. وەك ئەوەی ئێستا لەنێوان توركیاو ئیسڕائیل دەگوزەرێ.
گەلی کورد شایستەی ئەوەیە خۆی چارەنووسی داهاتووی خۆی دیاری بکات. مافەکانی کورد نابێت ببنە کارتێکی مامەڵەکردن ”، لەیارییە جیۆپۆلیتیکییەکانی هێزە گەورەكان.
لە١٧ی ئۆكتۆبەر، ئیسڕائیل و ئەمەریكا چیان بۆ كورد كرد؟ لەڕۆژئاوای كوردستان و سوریا، لەكاتی هێرشكردنە سەر كورد، دیسانەوە ئیسڕائیل و ئەمەریكا تەماشەكەرو مامەڵەچی بوون لەڕەوشەكەدا.
لەڕۆژهەڵاتی كوردستان، بەردەوامی هێرشی ئێران بۆسەر كەمپ و بارەگاكانی حیزبەكانی ڕۆژهەڵات، لەهەرێمی كوردستان، تائێستاش بێدەنگن.
تائەم دوایانەش ئیسڕائیل و توركیا، نزیكترین و زۆرترین بەرژەوەندیی سەربازیی و هەواڵگریان لەنێوندا هەبووەو ڕاماڵینی ڕژێمی ئەسەد لەسوریا، هەربەڕەزامەندیی و هەواڵگری هەردوو لایان ئەنجامدراوە. تەنانەت زۆربەی بەڵگەكانیش، باس لەهاوكاریی و بەشداری موسادی ئیسڕائیلی دەكەن، لەڕفاندنی عەبدوڵڵا ئۆجەلان، ڕێبەری پەكەكە.
ئەگەر ئیسڕائیل مەبەستی بوایەو بەرژەوەندیی درێژخایەن و ستراتیجی داهاتووی خۆی لەگەڵ كورد هەبایە،هەرگیز ڕێگای نەدەدا كوردەكانی ڕۆژئاوای كوردستان نیمچە كیانەكەیان بەم ڕۆژگارەی ئیمڕۆ بگات.
تەنها شتێك كەكورد پێویستە دەرسی لێ وەربگرێت، دەبێ وەك ئیسڕائیلیەكان وەڵامی جەرگ بڕو كوشندەی هەركەسێك بداتەوە، كەهێرشی دەكاتە سەر. لەجیاتی كوشتنی تاكێكی كورد، دەیان دوژمن بكوژێتەوەو لەجیاتی داگیركردنی بستێك خاكی، دەیان كیلۆمەتری دوژمنەكەی داگیربكات. كورد پێویستە چاو لەئیسڕائیلیەكان بكات، خیانەت و نۆكەریی و جاشەیاتی بۆ بێگانە نەكەن. بەڵام لەپێناو خاك و نەتەوەكەیدا، لەو جەنگەڵستانەی ڕۆژهەڵاتی ناوەڕاستداو كەچواردەوری بەداگیركەری تورك و فارس و عەرەب تەنراو، دەبێت شێرێكی دڕبێت، نەك كۆتری ئاشتی، ئەگەرنا هەردەبێ كوترێكی نێودەمی نێچیرەكانی بێت.