وەزارەتی دارایی حکومەتی فیدراڵ دەستی بە ڕێکارە ئیداری و داراییەکان کردووە بۆ ناردنی شایستە داراییەکانی مانگی هەشتی مووچەخۆرانی هەرێمی کوردستان، دوای ئەوەی ڕەزامەندیی فەرمی لەلایەن وەزیری دارایی عێراقەوە لەسەر تەمویلەکە دراوە.
ئاوێنە: لەو بارەیەوە، زیرەک زێباری، ئەندامی ئەنجومەنی نوێنەرانی عێراق ئاشکرای کرد کە وەزیری دارایی عێراق ڕەزامەندی لەسەر خەرجکردنی مووچەی مانگی هەشت دەربڕیوە و ڕێکارەکانی تەمویل لە وەزارەتی دارایی فیدراڵ دەستیان پێکردووە. ناوبراو ئاماژەی بەوەش کرد کە لە ئێستادا چاوەڕوانی تەواوبوونی هەنگاوەکان و ناردنی بڕە پارەکەن لە بەغداوە بۆ هەرێمی کوردستان.
پێداویستیی دارایی هەرێمی کوردستان بۆ دابەشکردنی مووچەی مانگی هەشت بڕی 962 ملیار دینارە، بەڵام بەپێی زانیارییەکان، بەغدا تەواوی ئەو بڕە تەمویل ناکات بەهۆی ئەوەی حکومەتی هەرێم ئامادە نیە داهاتی ناوخۆ رادەست بکات، بە لێبڕینی 120 ملیار دینار، کورتهێنان لە پارەی نێردراودا دروست دەبێت و تەنها بەشێکی ئەو شایستەیە ڕەوانەی هەولێر دەکرێت.