ئایا لاھور شێخ جەنگیی دیاردەیەکی نوێیە؟

ڕێباز حەسەن

2020-10-15 479

لە شەستەکانی سەدەی رابردووەوە، باکوری عێراق گیرۆدەی ململانێی دوو بییرکردنەوەیە، بەڵام دوو قوتابخانە و دوو دونیا بینیی و فیکری سیاسیی نییە، بەڵکو دوو دیدی خێڵەکییە بۆ پاوانکردنی زۆرتریین دەسەڵات بۆ دوو نوخبەی ناو دوو بنەماڵە. ئەم دوانەیش یەکێکیان رێژەی نەگۆڕە کە بنەماڵەی بارزانییە ئەوەی تریش زیاد لەجارێ خۆی گۆڕیوە و تێکڕای زۆنی ژێر ھەژموونی خۆی کردووە بە سیزیف و بەتەواوی بەرەو خولانەوەیەکی تاقەتپروکێن بردووە. رۆژ بە ڕۆژیش بازنەکانی بچوکدەبنەوە و خاوەندارەکانیشی پارەدارتر دەبن، لە منداڵەکانی ئیبرایم ئەحمەدەوە بۆ کوڕەکانی تاڵەبانیی و دواجاریش بۆ دوو کوڕەکەی نەوشیروان کە بوون بە گوێڕایەڵتریین و باشتریین دەسکێش و مەقاشەکانی پارتیی و بارزانیی لە سنوری سلێمانیی، واتا ڕێچکەی خەبات ھەمیشە دەچێتەوە ملکەچیی، تەسلیمبوون، پەشیمانیی و میللەتیش مات و مەلول و زەبون و ریسوا و تێھەڵدرا دەبێت و فەقەد ھەڵچۆڕانی دوایین دڵۆپ خوێن، لە جەستە و سزادانی ماددیی و مەعنەویی بۆ دەمێنێتەوە و دەخرێنە ناو مەنجەنیقی داخراوی حوکمی تاریک و ڕەشی کوردایەتیی .
لە دوایین نمایشی ئەم شانۆگەرییە سیاسییەدا، دەرکەوتن و ھاتنەپێشەوەی گەنجێکی تازەیە، ڕەنگە یەکەم کەس بێت لە مێژووی حیزبی سیاسیی کوردییدا کە بەو ماوە کەمە توانیبێتی بگات بە لوتکەی حیزب و سەرەڕمی ئەم بەرەیەی کە شەست ساڵ زیاترە شکەستی چنیوەتەوە. ئەمەیش ئایا مۆدیلێکی نوێیە، لە کاتێکدا ھیچ ڕوئیا و فیکرێکی ڕوونی سیاسیی دیارنییە، بەڵام لە پراکتیکی سیاسییدا ئاکتیڤیستێکی بەھێزە و مێژووی دەساڵی کارکردنی پێمان دەڵێت دوورە لە موجامەلە و شەرم و ترس .
لاھور شێخ جەنگیی، بە سود وەرگرتن لە دەزگای دژەتیرۆری حیزبەکەی بووە بە ناوێک کە ترسێکی بەھێزی پێش نەیارەکانی خۆی خستە دڵی بەرپرسە باڵاکانی حیزبەکەی، بەتایبەت دوای ئەوەی لە ئەنجومەنی ناوەندیی حیزبەکەی بووە چاودێر بەسەر وەسوەسە و دەرون و گیان و پەیوەندییە ژێربەژێرەکانی بڕیار بەدەستەکانی حیزبەکەی کە سەرئەنجام لە کۆنگرەدا کردیە کارتی بەھێز بۆ بوون بە سەرۆکی بێ ڕکابەری حیزبەکەی. ئەم ھەنگاوە خێرایەشی لەمێژووی چل و چوار ساڵی حیزبەکەیدا بە تاڵەبانیی و نەوشیروان مستەفا نەکرابوو، بەڵام ئەو توانی بیکات! بەجۆرێک ئەوانەی ھەر سەردەمە و بەناوێک لەتک و باڵێکی یەکێتییان دەخستە ئاشێکەوە بۆ ھاڕین! ئەوا لاھور ھات و ھەموو ئەوانەی ناردە ماڵەوە، کردنی بە یاداشتنامەنووسیی درۆزن و گەڕیدە و خوێنەری ڕۆمانەکانی بەختیار عەلیی ھەتا لە میتافۆڕی کاراکتەرەکاندا شەڕی باڵباڵێنی ھەشتاکان شەنوکەوبکەن و دەرونی قرچاویان بەوە ختوکەبدەن .
لاھور شێخ جەنگیی، توانی بەکەمتریین کات و زۆرتریین دەنگ ببێت بە سەرۆکی حیزب، بەڵام لە کۆی ٢١ پەرلەمانتاری حیزبەکەی تاقیان جورئەت و ھێزی ئەوەیان نەبوو ئیمزایەک دژی ڕکابەرەکەی بکەن لەحکومەت.
لاھور شێخ جەنگیی، توانی لە شەڕی داعشدا بە ھێزی دژەتیرۆری حیزبەکەی و بەیارمەتیی پێشمەرگە و گەریلاکانی پەکەکە سەرپەرشتیی پاراستنی ھەولێر بکات، بە گرتنەوە مەخمور .
ھەروەھا لە شازدەی ئۆکتۆبەری ساڵی ٢٠١٧ کەرکوک کە شاری پێکەوەژیانی ھەموو گەلانی عێراقە، توانی لە شەڕێکی نەتەوەیی بیپارێزێت بە کەمتریین ھەڵە و خوێنڕشتن، دووری بخاتەوە لە شەڕێکی خۆتڕێن! ھەڵبەت شەھیدبوونی ئەو ٨٠ پێشمەرگەیە لە ئەستۆی حیزبەکەیەتیی پاشان پارتیی، بەڵام ھەتا ئێستا نەیتوانیوە داکۆکیی لەو کردە عەقڵانییەی خۆی بکات، لەترسی تەخوینی کوردایەتیی بەڵام پارتی ھەمان کاری پێنج ڕۆژ پێش ئێستا لە شەنگال ئەنجامدا ھیچ کەس جەرائەتی نەبوو بڵێت خیانەتە بەڵکو بەیتوبالۆرەو شانامەی دیبلۆماسیەتی سەرکەوتووی بۆ ھۆنرایەوە.
ھەروەھا لاھور لە سیاسیەتی سەرکەوتووی خاوەنی پەیوەندییەکی بەھێزە، لەگەڵ ئیدارەی باکوری سوریا کە ناوەندێکی گرنگی سیاسیی و سەربازییە لە ململانێی و گۆڕانکاریی نوێ لە ناوچەکەدا.
ئەوەی ھەتا ئێرە ئەوەبوو کە ئەنجامی داوە، بەس ئەوەی گرنگە لەمەودوا دەتوانێت چیی بکات؟ بەتایبەتیی لە ئێستادا کە لەگەڵ ئەوەی ھیچ کەسێک لە حیزبەکەیدا ھێزی ئەوەی نییە و ناتوانێت بە خەونیش ببێت بە رکابەری، هەروەها لە دەرەوەی حیزبەکەیشی، بەرەی نەیاری پارتی تێکڕا بەجۆرێک لە جۆرەکان و بەشێکی حیزبەکەی خۆیشی ھەر یەکە و بەشێوازیێک و بە ڕۆڵ و پلەوپێگەی جیاوازبوون بە پارتیی نمرە دوو بەرەوخوار. ئەو گردەیش کە بووبوو بە مەکۆی سەرەکیی دژایەتییکردنی مێژووی حەفتا ساڵەی پارتیی و بارزانیی، ئێستا بووە بە لقی چوار، تەنیا نەوەی نوێ نەبێت کە ئەویش حیزبێکە ھێزی ئەوەی نییە بەرگەی دانیشتنێکی فازڵ میرانیی بگرێت و نەتوێتەوە !
ئایا لاھور شێخ جەنگیی، بەرگەی ئەو ھەموو لەمپەرەی بەردەم پارتیی دەگرێت؟ بەتایبەت گەر بەشێکی حیزبەکەی لەگەڵ پارتیی بکەونە رێککەوتنێکی نوێ و بیانەوێت بیخەنە دەرەوەی گۆڕەپانی سیاسیی؟
ئایا سەرلەبەری ئەم ھاتوھاوارە! تەنیا ڕۆڵدابەشکردن نییە لەناو حیزبەکەیدا بۆ درێژەدان بە بزنسی ئابوریی و سیاسیی و مانەوە لە بازنەیەکی بچوکدا بەڕازیی بوونی پارتییش؟ ئایا لاھورشێخ جەنگیی شەڕ بۆ دانپێدانانی ناکات لەلایان پارتییەوە؟
ئەگەر پارتیی، بەھەر جۆرێک بیەوێت لێی نزیک ببێتەوە سیحر و کاریزمای ئەو لە دڵی ھەوادار و لایەنگرەکانیدا بەتاڵ نابێتەوە؟
سەرچاوەی دارایی و توانای ئابوری لاھور لەکوێوە دێت کەوەک حکومەت دەرئەکەوێ ؟لە هەولێر مەکتەب ولە سلێمانی مەلعەب و لە راپەرین نەخۆشخانە دەکاتەوە چیە؟ لە قاچاغی گورمرگەکانە یان پارەی ئەمریکیەکانە؟
دواجار، وەک چۆن لە حیزبەکەیدا توانی تاڵەبانیی و نەوشیروان تێپەڕێنێت، ئایا دەتوانێت لە دژایەتییکردنی پارتیی-شدا ئەوان تێدەپەڕێنێت یان دواجار ڕێگەی سیاسیی ئەویش بەناوی یەکدەنگیی ناوماڵی کوردایەتیی، ئەویش دەچێتە ناو ئەو ڕیزەی حەفتا ساڵە قەتارەی بەستووە بەرەو پایزی زەردی تەمەنی سیاسییان.