ناکرێت مرۆڤێکی نەتەوەیی خۆی لە ئاستی نزیکبوونەوی کارەساتێک کوێر و کەڕ بکات کە پەی دەگوترێت مەترسی سەرهەڵدانی شەڕێکی براکوژی ، هەرچەند لە ئێستادا هەندێک لە لایەنگرانی پارتی و پەکەکە بە پاساوی جۆراوجۆر دەیانەوێت شەری براکوژی بەپێوەری نوێ لێک بدەنەوە و خۆیان لەو قێزەونییە بە دوور بگرن .
بەڵام پێش ئەوەی هەرجۆرە لێکدانەوەیەک بۆ گرژییەکانی نێوان پارتی و پەکەکە لە ئێستادا شرۆڤە بکەیین ، پێویستە ئەوە لەبەر چاو بگرین ئەگەری هەیە لە دوا رۆژدا حزبەکانی رۆژهەڵاتیی کوردستانیش بگرێتەوە ، مەگەر ئەوەیکە وەک چەندین ساڵی ڕابردوو هەروا کەمپنشینی بکەنە پێناسەی بەردەوامی خەباتی خۆیان .
بۆیەش بە پێویستی دەزانم لە روانگەی یاسایی دەسەڵاتی بەڕێوەبەری و دەسەڵاتی ئۆپۆزسیۆنی ، سیاسەت و تاکتیک و ستراتیژی ئەمرۆی پارتی دیموکراتی کوردستان ( باشوور )و پارتی کرێکارانی کوردستان ( پەکەکە ) هەڵسەنگێنم .
پێویستە تاکی کورد پێش ئەوەی بە شێوەیی دەمارگرژی بڕیار بدات ، یاسای دیپلۆماسییو پێوەندی هەمە لایەنەی سیاسیی و ئابووری حکومەت و پارتی دیموکراتی کوردستان لەزەمەنی دەسەڵاتداری فەرمیدا هەڵسەنگێنت ، کە ئاخۆ لە وەها کاتێکدا دەکرێت بە هەمان سیاسەتی تاکتیکی سەردەمی شاخ لە گەڵ دراوسێکانی هەڵسوکەوت بکات ؟
هاوکات بە پێی پرۆتۆکۆلەکانی نێودەوڵەتی لە کاتێکدا تورکیا بەشێکە لە هێزی ناتۆ، دەکرێت هەوا بە سانایی بڕیار لەسەرچۆنیەتی روو بەرووبوونەوەی بدرێت؟
ئەی رێککەوتنەکانی نێوان عێراق و تورکیا بە پێناسەی جیۆگرافیای سیاسیی و نێودەوڵەتی، لە وەها کاتێکدا چۆن هەڵسەنگاندنی بۆ دەکرێت؟
کاتێک پێوەرەکانی دەسەڵاتداری حکومەت و پارتی دیموکراتمان لەبەرچاو گرتووە، پێویستە مافەکانی پێوەندی سیاسیی ئۆپۆزسیۆنێکی چەکداریی وەک ( پەکەکە)ش کە دژبەری وڵاتێکی وەک تورکیایەو دراوسێی عێراق و ئێرانیشە بێتە کەوانی شرۆڤەیەکی زانستی، بە پێوەری گەمەی تاکتیکی ئۆپۆزسیۆنێکی خاوەن هێز و چەک وجیوگرافیایەکی وەک ئەمڕۆی زنجیرە چیاکانی قەندیل کە « پەکەکە » دەسەڵاتی بەسەریدا هەیە و پێویستە دراوسێکانی تورکیا بەکار بێنێت.
پەکەکە بەو تێگەیشتنەوە سیاسەتی تاکتیکی خۆی بەڕێوە دەبات ، بەڵام بێهەڵەش نەبووە ، چونکە زۆر جارلە پێناو بەرژەوەندیی تاکتیکی خۆیدا خەساری داوەلە بەرانبەرئێراندا وتەنانت ستراتیژیەتی ئایدۆلۆژیایی خۆشی خستۆتە ژێر پرسیارەوە بە چەشنی هەڵگەڕانەوەی ئەو پارتە لە دوای دەستبەسەرکردنی بەرێز « ئۆجەلان » لە پارتێکی نەتەوەیی بۆ ئایدۆلۆژیایەکی چەپی دژە ئیمپریالیستی .
بەو دووبەشە لە پێوەرەکانی سیاسەتی سەردەمی دەسەڵاتداری و ئۆپۆزسیۆنی سەردەمی شاخ بۆمان روون دەبێتەوە هەردووک لایەن واتە پارتی دیموکراتی باشووری کوردستان و پارتی کرێکارانی باکووری کوردستان، دەتوانن حەق بە خۆیان بدەن لە چۆن بەردەوامی سیاسەتی خۆیاندا ، بەڵام ئەوپرسیارانەی کە پێویستە تاکەکانی کۆمەڵگەی کوردی شەن و کەوی بکەن کامانەن ؟
پیلانەکانی دوو جەمسەری عوسمانیزم و سەفەویزمی شیعی بە لەبەرچاوگرتنی پلانی «ب» ی زلهێزان لە رۆژهەڵاتی ناوەڕاست لە دوای ساڵی 2020 ی زایینی دەتوانن چ کاریگەرییەکان هەبێت لە دنە دانی پارتی و پەکەکە ؟
ئاخۆ سیستمی ستراتیژی نەتەوە دەوڵەت و دەوڵەتنەتەوە ، لە روانگەی پەکەکەو پارتی کۆتایی پێهاتووە بۆ دابەشکردنەوەی رۆژهەڵاتی ناوەڕاست یان بەردەوامە ؟
ئاخۆ هووتافی پێکەوە ژیانی گەلان لە لایەن پەکەکەوە دەکەوێتە کەوانی تاکتیک لە بەرژەوەندی ستراتیژیدا یان فۆرمێکی چەسپاوە ؟
ئەگەرئەو فۆرمە تاکتیک بێت یانچەسپاو لە ئەساسنامەی پەکەکەدا ، ئاخۆ لە کردەوەدا هەموو پارت و ئەحزابی هەرچوارپارچەی کوردستان هەرهەمان هووتاف بەکردەوە پەیرەو ناکەن لە ئێستادا ؟
هەرچەند بەدەیان پرسیاریتر دەکرێت لە ئارا دابێت ، بەڵام پرسیاری کۆتایی ئەوەیە ، ئەگەرستراتیژی ئەحزابی کوردی ، بە پێوەری چەپی نەتەوەیی ، راستی نەتەوەیی ، ئیسلامی نەتەوەیی، بەڕاستی نەتەوەیی بێت چۆن ناکرێت کێشەکانیان چارەسەربکەن لە پێوەندییەکی نهێنیدا وەک سەردەمی جەنگی داعش ، ئەگەر دروستکراوی وڵاتانی ناوچەیی داگیرکەری کوردستان نین، بەبێجیاوازی ؟
ئەو پرسیارانەی کەوا دەمەوێت لە کاتی گونجاودا ئاراستەی سەرۆکایەتیی پارتی و پەکەکەی بکەم لێرەدا بە گونجاوی نازانم دڵی دوژمنانی پێخۆش بکەم ، بائەوەندە بەس بێت.
تێبینی :گرینگترین خاڵی بەهێزی نەتەوەیی و نیشتمانی سەرەڕای سیاسەت و رای جیاواز لێبوردەییە ، چونکە لەهەر رووداوێکی چەکداریدا رۆڵەی هەژاران دەبنە قوربانی ، ئەویش لە پێناو بەرژەوەندیی داگیرکەرانی کوردستان .