وەفدی دەم پارتی لەدوای كۆبونەوەی ئەمڕۆیان لەگەڵ ئەردۆغان لە راگەیەندراوێكدا كۆبونەوەكە بە "بەرهەمدارو پڕ لە هیوا" ناودەبات و دەشڵێت، بە سەرتاسەریی توركیای رادەگەیەنین كە ئەمڕۆ گەشبینترین لە دوێنێ.
ئاوێنە: وەفدی دەمپارتی كە ئەمڕۆ پێنجشەممە، لەگەڵ رەجەب تەیب ئەردۆغان، سەرۆك كۆماری توركیا كۆبونەوە، لە راگەیەندراوێكدا وتویەتی"كۆبونەوەكەمان لەگەڵ ئەردۆغان و وەفدی یاوەری، لە كەشێكی زۆر ئەرێنی و بونیادنەرو بەرهەمدارو پڕ لە هیوا بۆ ئایندەدا، بەڕێوەچو."
بەگوێرەی راگەیەندراوەكەی وەفدی دەم پارتی، لە كۆبونەوەكەدا "جەخت لە گرنگی ئەو خاڵە كرایەوە كە پرۆسەكە پێیگەیشتوە، ئاڵوگۆڕی بیروڕاكرا لەبارەی قۆناغەکانی داهاتو. راگەیەندرا، قۆناغێک کە توندوتیژی و ململانێی تێدا نەبێت و کایەی دیموکراسی و سیاسی تێدا بەهێزتر بكرێت، گرنگییەکی تەواوی بۆ وڵات و هاوڵاتیانمان و ناوچەکەمان هەیە."
ئاماژەی بەوەشداوە "وەفدو پارتەكەمان لە قۆناغی داهاتودا بە ئیرادەو پەرۆشییەكی بەهێزترەوە بەردەوام دەبن لەسەر كارەكانیان بۆ جێبەجێکردنی بانگەوازی ئاشتی و کۆمەڵگەی دیموکراتی. جێی شانازیمانە بەسەرتاسەریی وڵاتەكەمانی رابگەیەنین كە ئێمە ئەمڕۆ گەشبینترین لەچاو دوێنێ."
وەفدەكەی دەم پارتی وتوشیەتی"سوپاسی خۆمان ئاڕاستەی تەواوی لایەنە سیاسییەکان و توێژە کۆمەڵایەتییەکان دەكەین کە بە پێشنیارو هۆشداری و ڕەخنەکانیان پڕۆسەكەیان بەهێزكردوە."