بەرپرسێکی باڵای رەوتی حیکمە رایدەگەیەنێت، سەرۆکی هاوپەیمانی دەوڵەتی یاسا بەکشانەوە رازی بووە، هاوکات لەسەر پۆستی سەرۆککۆماریش چوارچێوەی هەماهەنگی بە دابەشبوونی دەنگەکانییەوە دەچێتە پەرلەمان.
ئاوێنە: سەباح ساڵحی، ئەندامی مەکتەبی جێبەجێکردنی رەوتی حیکمە بۆ میدیای پارتی ئاشکراکرد "لەدواین کۆبوونەوەی چوارچێوەی هەماهەنگیدا پێشنیازی کشاندنەوەی نوری مالیکی کراوە".
وتیشی "سیناریۆکە بەو شێوەیەیە نوری مالیکی بەفەرمی پۆستی سەرۆکوەزیران وەربگرێت و دواتر لەسەر ویستی خۆی بکشێتەوە، نەک بەهۆی ناڕەزایەتی و لێدوانەکانی دۆناڵد ترەمپ، سەرۆکی ئەمریکاوە، بەگوێرەی زانیارییەکانیش نوری مالیکی بەم پێشنیازە و کشانەوەکە رازی بووە".
ئەو بەرپرسەی رەوتی حیکمە باسی لەوەشکرد، چوارچێوەی هەماهەنگی ئێستا چاوەڕوانی هێوربوونەوەی گرژییەکانی نێوان ئێران و ئەمریکایە و نایەوێت هەنگاوێک بنێت کە ئاڵۆزی زیاتری بەدوادا بێت.
پەیوەست بە پۆستی سەرۆککۆمارەوە، ساڵحی رایگەیاند "دواکەوتنی هەڵبژاردنی سەرۆککۆمار تەنیا پەیوەست نییە بە کوردەوە، بەڵکو پەیوەندی بە لایەنە شیعەکانیشەوە هەیە کە دەخوازن کاتی زیاتریان لەبەردەستدا بێت بۆ بڕیاردان.
دەشڵێت "بە لایەنە کوردستانییەکانمان وتووە دەبێت رێکبکەون، ئەگەرنا چوارچێوەی هەماهەنگی لەکاتی دەنگدان بۆ کاندیدی سەرۆککۆمار دابەشی دوو بەرە دەبن".