بەڕێوەبەرى گشتیی دەستەی گومرگی عێراق دامەزراندنی چوار فەرمانگەی گومرگی لە سنوورەکانی هەرێمی کوردستان پشتڕاستکردەوە، هەروەها ئاماژەی بە پەسەندکردنی سیستەمی ئاسیکودا و ڕێگریکردن لە چوونە ژوورەوەی کاڵاکان لە ڕێگەی دەروازە سنوورییە فیدراڵییەکانەوە کرد.

ئاوێنە: سامر قاسم بەڕێوبەرى گشتی دەستەی گومرگی عێراق سەبارەت بە دامەزراندنى چەند فەرمانگەیەکى گومرگى بۆ کۆنترۆڵکردنى هاوردەى کاڵا لە سنوورەکانى هەرێمى کوردستانەوە، رایگەیاند، هەنگاوەکانی داهاتووی دەستەکەیان بریتین لە ئاڵوگۆڕی داتا و زانیاری لەگەڵ وڵاتانی هەناردەکار، ئاسانکردنی ڕێکارەکان، هاوبەشکردنی زانیاری، دەستنیشانکردنی مەترسییەکان، ئەلیکترۆنى کردنى کارەکانی گومرگی و ئاسانکاری بازرگانی بۆ بازرگانان و وەبەرهێنەران.

ئاماژەی بەوەشکرد، دەسەڵاتی گشتی گومرگی چوار فەرمانگەی گومرگی بەدرێژایی سنووری هەرێم لەگەڵ هەرێمی کوردستان دامەزراندووە، ڕۆڵی فەرمانگەکان کۆکردنەوەی باجی گومرگە لەسەر ئەو کاڵایانەی لە هەرێمەوە دێن، چونکە دەروازە سنوورییەکانی هەرێم ئەلیکترۆنى  نین، بەو هۆیەوە پابەند نین بەو باجانەی کە لە دەروازە سنوورییەکانی حکومەتی فیدراڵی بەکاردەهێنرێن.

لە کۆتاییدا ئەوەشی خستەڕوو، فەرمانگەکان بەسەر بازگە سنوورییەکانی نێوان عێراق-هەرێمی کوردستان دابەشکراون، بەتایبەتی لە بازگەی پارێزگای نەینەوا، کەرکووک، بازگەی باوە مەحموود لە نێوان ئیدارەی گەرمیان و پارێزگای دیالە.