وەزارەتی دەرەوەی توركیا رایده‌گه‌یه‌نێت، هەندێك گروپ لێدوانه‌كه‌ی هاكان فیدانیان لەبارەی عێراق شێواندوە. جه‌ختیش له پشتیوانی وڵاته‌كه‌ی بۆ یەکپارچەیی خاک و سەروەری عێراق ده‌كاته‌وه.
ئاوێنه: ئۆنگۆ کێچلی، وتەبێژی وەزارەتی دەرەوەی توركیا، لە بەیاننامەیەكدا لەبارەی لێدوانەکانی وەزیری دەرەوەى توركيا، لە کەناڵێکی تەلەفزیۆنی سەبارەت بە عێراق، وتی: وا دیارە بەشێک لەو لێدوانانەی هاكان فیدان لە چاوپێکەوتنێکی تەلەفزیۆنیدا لە 9ی شوباتی 2028 رایگەیاند، لەلایەن هەندێک دەزگای راگەیاندن لە عێراق شوێنراوە.
هێمای بۆ ئه‌وه‌ش كرد، لە هەمو دەرفەتێکدا دوپاتی دەکەینەوە، ئامانجمان ئەوەیە ئەو هاوکارییە دامەزراوەیی و بونیادنەر و بەرهەمدارە بەهێز بکەین کە بەم دواییە لەگەڵ عێراقدا به‌نزیكه‌یی له هەمو بوارەکاندا دامانمەزراندوە، بە ئاسایش و روبەڕوبونەوەی تیرۆریشەوە.
وتوشیه‌تی، ئەو لێدوانانەی وەزیری دەرەوەمان لە چاوپێکەوتنەکەی پێشودا، کە لەم تێگەیشتنە لە هاوکارییەوە سەرچاوەی گرتوە، بە مەبەستی ڕاکێشانی سەرنج بو بۆ ئەو مەترسییەی کە لە لایەن رێكخراوی په‌كه‌كه‌وە بۆ سەر یەکپارچەیی خاکی عێراق و ئاسایشی عێراق دروست بوە، کە بەشێک لە خاکی عێراق بە تایبەتی لە شنگال و مەخمور و قەندیلى كردوەتە بارەگای خۆی.
ئه‌وه‌شی خستۆته‌ڕو، لەو چوارچێوەیەدا، وەزیرەکەمان جەختی لە خواستمان كردەوە بۆ نەهێشتنی تەواوەتی رێكخراوی په‌كه‌كه لە خاکی عێراق، وەک ئەوەی لە سوریا ئەنجامدرا، هەروەها پێویستی زیادکردنی هاوکاریی ئێستامان لەگەڵ حکومەتی عێراق لەم بوارەدا.
هێمای بۆ ئه‌وه‌ش كرد، بۆیە شێواندنی لێدوانەکانی وەزیری دەرەوە لەلایەن هەندێک گروپەوە رەتدەکەینەوە، کە لە چوارچێوەی خۆی دەریانهێناوەو بانگەشەی ئەوە دەکەن کە دەستوەردانە لە کاروباری ناوخۆی عێراق.
جه‌ختیشی كرده‌وه، بەم بۆنەیەوە ئێمە وەک تورکیا پشتیوانی خۆمان بۆ یەکپارچەیی خاکی و سەروەری عێراقی دراوسێمان دوپات دەکەینەوە.