وەزیری پێشووی گواستنەوە و راسپێردراوی پێشوتر بۆ پێکهێنانی حکومەتی عێراق، هۆشدارییەکی توند لەبارەی بارودۆخی دارایی‌ و ئابووری وڵات دەدات‌ و ڕایدەگەیەنێت، عێراق لە ئێستادا لەبەردەم لێواری هەڵدێردایە.

ئاوێنە: محەمەد تۆفیق عەلاوی، وەزیری پێشووی گواستنەوەی عێراق لە چاوپێکەوتنێکی تەلەفزیۆنییدا ڕایگەیاند: نیشانەکانی ئەم قەیرانە لە ئێستاوە دەرکەوتوون، لەوانە بڕینی دەرماڵەکان‌ و کەمکردنەوەی مووچەو زیادکردنی باجی گومرگی، کە بوونەتە هۆی دروستبونی ناڕەزایەتی‌ و مانگرتن لەشەقامەکاندا.

ئەو پێیوایە داهاتووی وڵات بەرەو خراپتر دەچێت‌ و هەر مانگێک لە مانگی پێشوو سەختتر دەبێت، چونکە هاوکێشەی دارایی وڵات زۆر سادەیەو بریتییە لەناهاوسەنگییەکی گەورە لە نێوان داهات‌ و خەرجییەکاندا، بەجۆرێک کە خەرجییەکان زۆر زیاترن لەو داهاتەی دەستدەکەوێت.

سەرەڕای ئەم وێناکردنە مەترسیدارە، عەلاوی دەڵێت، “هێشتا هیوایەکی گەورە ماوە بۆ ڕزگاربوون‌ و دوورکەوتنەوە لەو هەڵدێرە، بەڵام ئەمە پێویستی بەگرتنەبەری سیاسیەتێکی نوێ‌ و پلانێکی جیاوازو تێکۆشانێکی زۆر هەیە بۆ ئەوەی بتوانرێت بەر بەو داڕمانە ئابوورییە بگیرێت کە هەڕەشە لە داهاتووی عێراق‌ و بژێوی ژیانی هاووڵاتیان دەکات، چونکە بەردەوامبوون لەسەر ئەم دۆخەی ئێستا کارەساتی گەورەی لێدەکەوێتەوە.

داهاتی حکومەتی عێراق زۆرینەی لەسەر نەوتە، لە ئێستاشدا بەهۆی دابەزینی نرخی نەوت لە بازاڕەکانی جیهان، عێراق دووچاری قەیرانی دارایی بووەتەوە، بەو هۆیەوە بۆ بەرزکردنەوەی داهاتی خۆی پەنای بردووەتە بەر زیاد کردنی باج و گومرگ، ئەمەش بۆ بەرزکردنەوەی ئابورییەکەی.