نوری مالیکی، سەرۆکی هاوپەیمانی دەوڵەتی یاسا پێشوازی لە تۆم باراک، نێردەی تایبەتی ئەمریکا لە سوریا کرد، ئه‌وه له‌كاتێكدایه پێشتر دۆناڵد تره‌مپ، سه‌رۆكی ئه‌مریكا كاندیدكردنی مالیكی بۆ پۆستی سه‌رۆك وه‌زیران ره‌تكردبوه‌وه.
ئاوێنە: هیشام ریکابی، بەڕێوەبەری نوسینگەی مالیکی، لە پۆستێکدا له هه‌ژماری تایبه‌تی خۆی باسی له‌وه‌كردوه، نوری مالیکی، سەرۆکی هاوپەیمانی دەوڵەتی یاسا، پێشوازی لە تۆم باراک، نێردەی تایبەتی ئەمریکا لە سوریا کردوە.
تائێستا زانیاریه‌ك له‌باره‌ی ناوه‌ڕۆكی كۆبونه‌وه‌كه ئاشكرا نه‌كراوه، له‌كاتێكدا به‌هۆی ناكۆكییه‌كانه‌وه هه‌ڵبژاردنی سه‌رۆك كۆماری عێراق و پێكهێنانی كابینه‌ی نوێی حكومه‌تی عێراق دواخراوه.
چوارچێوەی هەماهەنگی مالیکی بۆ پۆستی سەرۆک وه‌زیرانی هه‌رێمی كوردستان کاندید کردوه، بەڵام واشنتن هۆشدارییەکی ڕونی بۆ بەرپرسانی عێراقداوه کە لە ئەگەری هەڵبژێردرانەوەی مالیکیدا، ڕەنگە چاو لە پاڵپشتییەکانی خۆی بۆ عێراق بخشێنێتەوە.
نوری مالیکی، كاندیدی چوارچێوه‌ی هه‌ماهه‌نگی بۆ پۆستی سه‌رۆك وه‌زیرانی عێراق له دوایین لێدوانیدا ڕەتکردەوە کە باس لەوە دەکەن کە ڕەنگە لە کێبڕکێی سه‌رۆك وه‌زیران بكشێته‌وه، "کەس مافی ئەوەی نییە بڵێت دەتوانین یان ناتوانین دەنگ بە کێ بدەین یان ناتوانین دەنگ بە کێ نه‌ده‌ین".
له‌باره‌ی په‌یوه‌ندیه‌كانی عێراق و ئه‌مریكا، نوری مالیكی وتی، "ئەمریکا دڵنیا دەکەمەوە کە چەک بەدەستی دەوڵەتەوە دەبێت و پەیوەندییەکانیشمان لەگەڵ ئەمریکا لەسەر بنەمای بەرژەوەندیی هاوبەش دەبێت".
په‌یوه‌ست به گرژییه‌كانی ناوچه‌كه‌ش، مالیكی رونیكرده‌وه، "رێگە بە هیچ دەستدرێژییەك بۆ سەر باڵیۆزخانەكانی لە عێراق نادەین".