بانکی ناوەندیی عێراق ڕایگەیاند، دڵنیایی دەدەینە هاوڵاتییان کە یەدەگی دراوی وڵات لە ئاستێکی زۆر ئارامدایە و پلان و جێگرەوەی پێویستمان بۆ دابینکردنی مووچە و خەرجییەکان هەیە، ئەوەشخرایەڕوو، کە عێراق خاوەنی یەدەگێکی زۆر باش و بەهێزی دراوی بیانییە.
ئاوێنە: بانکی ناوەندیی عێراق، سەبارەت بە هەڵسەنگاندنی دۆخی ئابووریی و دارایی عێراق و تاوتوێکردنی ئەو مەترسییانەی کە بەهۆی ئاڵۆزی و گرژییەکانی ناوچەکەوە ڕووبەڕووی عێراق بووەتەوە، کۆبوونەوەی نائاسایی خۆی ئەنجام دا.
بانکی ناوەندیی ڕایگەیاند، هاوڵاتییان ئاگادار دەکەینەوە، کە یەدەگی دراوی عێراق لە ئاستێکی ئارامدایە و پلان و جێگرەوەی پێویستمان بۆ دابینکردنی مووچە و خەرجییەکان هەیە.
ئاماژە بەوەش کراوە، یەدەگی ئێستا بەشی ١٢مانگی هاوردەکردنی کاڵا و پێداویستییەکان دەکات، ئەمەش وادەکات بانکەکە توانای تەواوی هەبێت بۆ پاراستنی بەهای دینار و سەقامگیریی دارایی، هاوکات، عێراق خاوەنی یەدەگێکی زۆر باش و بەهێزی دراوی بیانییە.
باس لەوەش کراوە، کە کار دەکەن بۆ ئەوەی ژیان و گوزەرانی هاوڵاتییان پارێزراو بێت و هیچ گرفتێک لە دابینکردنی شایستە داراییەکان و چالاکییە ئابوورییەکاندا درووست نەبێت.