دۆخی ئەمنی لە عێراق ڕووی لە گرژیی زیاتر کردووە و زنجیرەیەک هێرشی ئاسمانی و موشەکی بارەگاکانی حەشدی شەعبی و دەوروبەری فڕۆکەخانەی نێودەوڵەتی بەغدایان کردە ئامانج.
ئاوێنە: دەستەی حەشدی شەعبی بە فەرمی ڕایگەیاند، لە ئەنجامی بۆردومانکردنی بارەگایەکیان لە پارێزگای ئەنبار، ٦ چەکداریان کوژراون و ٤ی تریش برینداربوون. هاوکات سەرچاوە ئەمنییەکان بۆ (الجزيرة) پشتڕاستیان کردەوە کە لە هێرشێکی تردا بۆ سەر بارەگایەکی حەشد لە بابل، ٢ چەکداری تریش گیانیان لەدەستداوە.
شەوی ڕابردوو لانی کەم ٥ موشەک ئاراستەی کۆمەڵگەی فڕۆکەخانەی نێودەوڵەتی بەغدا کراون، کە ناوەندی پشتیوانی لۆجیستی باڵیۆزخانەی ئەمریکای لێیە.
لیوا سەعد مەعەن، سەرۆکی شانەی ڕاگەیاندنی ئەمنی ئاشکرای کرد، هێرشە موشەکییەکەی سەر فڕۆکەخانە بووەتە هۆی برینداربوونی ٤ فەرمانبەری ئەمنی و ئەندازیارێک.
حەشدی شەعبی لە بەیاننامەیەکدا ڕایگەیاند: "ئەم دەستدرێژییانە تەنها پێداگیریمان بۆ بەرگریکردن لە سەروەری عێراق زیاتر دەکات."
گرووپی "سرايا أولياء الدم" بەرپرسیارێتی هێرشەکەی سەر بنکەی ڤیکتۆریا لە فڕۆکەخانەی بەغدای گرتە ئەستۆ و بانگەشەی ئەوە دەکات کە ٦ سەربازی ئەمریکی کوژراون و ٤ی دیکە بریندار بوون، هەرچەندە لایەنی فەرمی هێشتا ئەم ژمارەیەیان پشتڕاست نەکردووەتەوە.
ئەم گرژییانە لە کاتێکدایە کە گرووپە چەکدارەکان دەڵێن لە ٢٨ی شوباتی ڕابردووەوە (دەستپێکی شەڕی ئەمریکا و ئیسرائیل دژی ئێران) دەیان ئۆپەراسیۆنی سەربازییان ئەنجام داوە.
ئەمریکا و ئیسرائیل لە ٢٨ی شوباتی ڕابردووەوە دژی ئێران دەستیان پێکردووە، گەیشتووەتە ناو خاکی عێراق و کاریگەرییەکی قورسی دروست کردووە:
ڕاگرتنی گەشتە ئاسمانییەکان: لە یەکەم ڕۆژی دەستپێکی جەنگەکەوە، بزووتنەوەی فڕۆکەوانی لە تەواوی فڕۆکەخانەکانی عێراق ڕاگیراوە و کایەی ئاسمانی وڵاتەکە بە تەواوی داخراوە.
هێرش بۆ سەر باڵیۆزخانەی ئەمریکا: بەرەبەیانی ڕۆژی شەممە، باڵیۆزخانەی ئەمریکا لە ناوچەی سەوزی بەغدا ڕووبەڕووی هێرشێکی توند بووەوە. بەپێی سەرچاوە ئەمنییەکان بۆ کەناڵی جەزیرە، لەو هێرشەدا سیستەمی بەرگریی ئاسمانیی باڵیۆزخانەکە بە تەواوی تێکشکێندراوە.
بۆردومانکردنی گروپە چەکدارەکان: چەندین غارەتی ئاسمانی کراونەتە سەر بارەگاکانی ئەو گروپە عێراقییانەی کە نزیکن لە ئێران (کە واشنتۆن بەشێکیانی خستووەتە لیستی تیرۆرەوە). هەرچەندە ئەمریکا و ئیسرائیل تۆمەتبار دەکرێن بەو هێرشانە، بەڵام تا ئێستا بە فەرمی پشتڕاستیان نەکردووەتەوە.
بەردەوامی هێرشەکانی "بەرگری ئیسلامی": گروپەکانی ناو "بەرگری ئیسلامی لە عێراق" ڕۆژانە بەرپرسیارێتی خۆیان لە ئەنجامدانی هێرشی موشەکی و درۆن بۆ سەر "بنکەکانی دوژمن" لە ناوخۆی عێراق و ناوچەکە ڕادەگەیەنن.
ئامانجەکان لە فڕۆکەخانەی بەغدا: مەکۆی فڕۆکەخانەی بەغدا کە چەندین بنکەی سوپا و دەزگا ئەمنییەکانی عێراق و تیمی پاڵپشتی باڵیۆزخانەی ئەمریکای تێدایە، لە دوای هەڵگیرسانی جەنگەکەوە چەندین جار بووەتە ئامانجی ئەم جۆرە هێرشانە.