ئەمڕۆ ئەنجومەنی وەزیرانی عێراق کۆبوونەوەی ئاسایی خۆی گرێدا و تیایدا وێڕای ئەوەی سەرکۆنەی هێرشەکانی سەر پێگەکانی حەشد و پێشمەرگە کراوەتەوە، وەزیری دارایی بەغداش دڵنیایی داوە کە مووچەی فەرمانبەران "مسۆگەر"ە.
ئاوێنە: نوسینگەی راگەیاندنی سەرۆك وەزیرانی عێراق لەمیانی راگەیەندراوێکدا ئاماژەی بەوەکردووە، لە كۆبونەوەی ئەمڕۆی ئەنجومەنی وەزیراندا، سەركۆنەی هێرشەکانی سەر پێگەکانی حەشدی شەعبی و "جەنگاوەرانی" پاسەوانی هەرێمی کوردستانی (پێشمەرگە) کراوە.
هەروەها، جەختيش كراوە لە پاراستنی ئاسایش و سەروەری عێراق و پاراستنی دامەزراوە و سامانی گشتی و تایبەت و پاراستنی باڵیۆزخانە و نوێنەرایەتییە دیپلۆماسییەکان.
سەبارەت بە بابەتە داراییەکانیش نوسینگەکە دەڵێت "وەزیری دارایی پوختەیەکی لەبارەی دۆخی دارایی خستوەتەڕوو، جەختی لە دروستی ئەو رێکار و رێوشوێنە خۆپارێزییانە كردووەتەوە كە گیراونەتەبەر، بەجۆرێك شیاوی بارودۆخی ئێستا بێت".
تەیف سامی وتوشیەتی "وەزارەت خەرجییە پێویستەکانی مسۆگەر کردووە و لەگەڵ پێدانەكانی تری حكومەت و لەنێویشیاندا تەواوی مووچە".
جگە لەوەش، ئەنجومەنی وەزیرانی عێراق لە كۆبونەوەكەیدا؛ میوانداری بەڕێوەبەری کۆمپانیای بەبازاڕکردنی نەوت (سۆمۆ)ی کردووە، کە روونکردنەوەی وردی لەبارەی میکانیزم و رێکارەکانی فرۆشتنی نەوتی خاو پێشكەش كردووە، لەگەڵ پلانەکانی وەزارەت لە بواری هەناردەکردن و رێگا پێشنیازکراوەکانی فرۆشتنی نەوت لەوانە، لەڕێی بەندەری کەرکوک-جەیهانی تورکی.