هێزە چەکدارەکانی ئێران کۆڵبەرێکیان بە برینداری کوشت کە باوکی دوو منداڵە.
ئاوێنە: ئەمڕۆ پێنجشەممە، ڕێکخراوی مافی مرۆڤی هەنگاو بڵاویکردەوە، ڕۆژی چوارشەممە لە بەرزاییە سنوورییەکانی گوندی “بەلەجووک”ی سەر بە ناوچەی کۆتۆل لە شاری “خۆی”، کۆڵبەرێک بە تەقەی ڕاستەوخۆی هێزەکانی پاسەوانی سنووریی ئێران کوژرا.
ڕێکخراوی هەنگاو ڕوونیشیکردەوە کە هێزەکانی ئێران سەرەتا بێ ئاگاداریی پێشوەختە تەقەیان لە دەستەیەک لە کۆڵبەران کردووە کە لە ئەنجامدا ڕەسوول قەڵەندەری بریندار بووە، بەڵام هێزەکانی ئێران چوونەتە سەر سەری کۆڵبەرە بریندارەکە و سێ گوللەیان لەسەری داوە و کوشتوویانە.
ئەوەشی خستەڕوو کە ڕەسوول قەڵەندەری تەمەن ٢١ ساڵ؛ خێزاندار و باوکی دوو منداڵی ٣ ساڵان و ٥ مانگان بوو.