بەڕێوەبەرایەتیی گشتیی کەشناسی و بوومەلەرزەزانیی سەربە حکوومەتی هەرێمی کوردستان، ڕەوشی کەشوهەوای بۆ ٤٨ کاتژمێری داهاتوو ڕاگەیاند و ئاماژە بە گۆڕانکارییەکانی کەشوهەوا و بەرزبوونەوەی پلەکانی گەرما دەکات.

​بەگوێرەی ڕاگەیەندراوەکەی کەشناسی، بۆ ئەمڕۆ سێشەممە (٢٢ی ئەیلوول)، ئاسمان بەگشتی ساماڵ دەبێت لەگەڵ دەرکەوتنی هەندێک پەڵەهەور، هەروەها ئەگەری دروستبوونی تۆزێکی سووک لە ئارادایە. هاوکات پلەکانی گەرما بەراورد بە تۆمارکراوەکانی ڕۆژی ڕابردوو، بە بڕی ١ بۆ ٢ پلەی سیلیزی بەرز دەبنەوە.

​لەبارەی کەشوهەوای سبەی چوارشەممە (٢٣ی ئەیلوول)، دامەزراوەکە پێشبینی دەکات کە ئاسمان بە تەواوی ساماڵ بێت و شەپۆلی گەرماکە کاریگەریی زیاتر بێت. بەپێی داتاکانی کەشناسی، پێشبینی دەکرێت ڕۆژی چوارشەممە ببێتە گەرمترین ڕۆژی تەواوی مانگی ئەیلوول لە هەرێمی کوردستان.

​هەر لە ڕاگەیەندراوەکەدا، خشتەی پێشبینیکراوی بەرزترین پلەکانی گەرمای بۆ ئەمڕۆ سێشەممە و سبەی چوارشەممە لە شار و ناوچە جیاجیاکانی هەرێمی کوردستان بەم شێوەیەی خوارەوە خستووەتەڕوو:

شار و ناوچەکان - سێشەممە - چوارشەممە

هەولێر: 37 — 39

سلێمانی: 36 — 38

دهۆک: 37 — 38

هەڵەبجە: 37 — 39

چەمچەماڵ: 38 — 39

زاخۆ: 38 — 39

گەرمیان: 41 — 43

سۆران: 35 — 37

پیرمام: 32 — 34

ئاکرێ: 37 — 39

حاجی ئۆمەران: 29 — 30