ئەمڕۆ پێنجشەممە ٢٧ی ئاب، سەباح نوعمان، وتەبێژی عەلی زەیدی، فەرماندەی گشتیی هێزە چەکدارەکانی عێراق، لە میانی کۆنگرەیەکی رۆژنامەوانیدا وردەکارییەکانی پەیوەست بە پرۆسەی کشانەوەی هێزەکانی هاوپەیمانان و پرسی رێکخستنی چەکی لە ناوخۆی وڵاتدا ئاشکرا کرد.
ئاوێنە: لە لێدوانەکەیدا، نوعمان ئاماژەی بەوە دا کە هەنگاوەکانی کشانەوەی هێزەکانی هاوپەیمانان لە خاکی عێراق بە خێراییەکی بەرچاو بەڕێوە دەچن و دەستیان پێ کردووە. هەروەها دووپاتی کردەوە کە رێکەوتی ٣٠ی ئەیلوول وەک کاتی کۆتاییهاتنی ئەو پرۆسەیە دیاری کراوە.
لە بەشێکی تری کۆنگرە رۆژنامەوانییەکەدا، وتەبێژەکە تیشکی خستە سەر پرسی چەکداریی ناوخۆیی و رێکخستنەوەی چەک، و بە توندی جەختی لەوە کردەوە کە "پێویستە چەک بە شێوەیەکی تەواوەتی لە سایەی شەرعییەت و یاساکانی دەوڵەتدا بێت."
هاوکات لەگەڵ ئەم پێشهاتانە، حکوومەتی عێراق بڕیاری داوە کە هەمان رێکەوت، واتە ٣٠ی ئەیلوول، وەک دوا مۆڵەت بۆ چەکدانانی میلیشیاکان دیاری بکرێت. ئەم بڕیارەی حکوومەت بە جۆرێک رێکخراوە کە راستەوخۆ هاوکات بێت لەگەڵ تەواوبوونی پرۆسەی کشانەوەی هێزەکانی هاوپەیمانان لە عێراق، بۆ ئەوەی دۆخی ئەمنیی وڵات بە تەواوی بکەوێتە ژێر کۆنتڕۆڵی دامەزراوە فەرمییەکانەوە.