تەیف سامی، وەزیری پێشووی دارایی عێراق، سەرجەم ئەو دەنگۆ و هەواڵانەی رەتکردەوە کە باس لە جێهێشتنی عێراق، هەڵوەشاندنەوەی ڤیزای ئەمریکا و خستنە ناو لیستی چاودێری تیرۆرەوە دەکەن، و ڕایگەیاند کە سەرجەم ئەو زانیارییانە دوورن لە ڕاستییەوە.
ئاوێنە: لە ڕاگەیەندراوێکدا کە ئەمشەو بڵاوکرایەوە، تەیف سامی ڕوونی کردەوە کە لە ناو عێراقدا و وڵاتی جێ نەهێشتووە. سەبارەت بەو لێدوان و هەواڵانەی لەم دواییانەدا بڵاو بوونەتەوە، ئاماژەی بەوە کرد کە تاوەکو ئێستا لەلایەن هیچ دادگایەکەوە بانگهێشت نەکراوە و هیچ ئاگادارکردنەوەیەکی فەرمی یان یاسایی پێ نەگەیشتووە، جەختیشی لەوە کردەوە کە قەدەغەکردنی گەشتکردنی بۆ ئەمریکا تەنها لێدوانی سیاسیی هەندێک لە ئەندامانی کۆنگرێسە و هیچ بڕیار یان بەڵگەیەکی فەرمیی حکومی لەپشتەوە نییە.
لە بەشێکی تری قسەکانیدا، وەزیری پێشووی دارایی ئاماژەی بەوە دا کە سەردانەکانی پێشووی بۆ واشنتن تەنها بۆ مەبەستی فەرمی و بەشداریکردن بووە لە کۆبوونەوەکانی سندوقی دراوی نێودەوڵەتی و بانکی جیهانی، بەڵام لە ئێستادا و دوای خانەنشین بوونی، هیچ پلان و مەبەستێکی نییە بۆ ئەنجامدانی گەشت بۆ واشنتن. هاوکات هۆشداریی دا کە مافی یاسایی خۆی دەپارێزێت و رێکاری توند دژی هەر لایەن یان دەزگایەک دەگرێتەبەر کە زانیاریی چەواشەکارانە و ناڕاست دژی بڵاو بکاتەوە.
ئەم ڕونکردنەوەیەی تەیف سامی لە دوای ئەوە هات کە چەند دەزگایەکی ڕاگەیاندن، لەوانەش کەناڵی "فۆکس نیوز"ـی ئەمریکی، بڵاویان کردبووەوە کە ئیدارەی دۆناڵد ترەمپ ڤیزای ناوبراوی هەڵوەشاندووەتەوە و خستوویەتییە ناو لیستی چاودێریی تیرۆرەوە بە تۆمەتی هاوکاریکردن لە دابینکردنی دارایی و هەروەها بوونی دۆسیەی گەندەڵی لە عێراقدا، لێدوانە نوێیەکانیش سەرجەم ئەو تۆمەت و هەواڵانە بە توندی ڕەت دەکەنەوە.