وێڕای ئەوەی تاران ملکەچی داواکارییەکانی ئەمریکا نابێت، هاوکات بەرپرسیارییەتیی پێشێلکردنی رێککەوتنی ئیسلام ئابادش دەخاتە ئەستۆی واشنتۆن و دەڵێت "دەبێت ئەمریکا سزا بدرێت".
ئاوێنە: ئیسماعیل بەقائی، وتەبێژی وەزارەتی دەرەوەی ئێران لە کۆنفراسنی رۆژنامەوانی هەفتانەیدا وتی "لە هەر گفتوگۆیەکدا لەبارەی لێکتێگەیشتنی ئیسلام ئاباد، نابێت ئەوە فەرامۆش بکرێت کە ئەمریکا رێککەوتنێک بە رەسمی لە بەرزترین ئاستی دەسەڵاتیدا واژۆی لەسەر کردبوو، پێشێلیکردووە".
وتیشی "لایەنی ئەمریکی تەنها ٢٢ رۆژ دوای ئیمزا کردنی رێککەوتنەکە، بە ئاگادارییەوە بڕیاری پێشێلکردنی داوە". بەقایی جەختیشی کردەوە، بەردەوامیی گەمارۆکان و گۆشەگیریی دەریایی لەلایەن ئەمریکاوە، بە کردەوەیەکی دوژمنکارانە هەژمار دەکرێت.
سەبارەت بە سەردانی سوپاسالاری پاکستان بۆ تاران، وتەبێژی عەباس عێراقچی رونیکردەوە "ئەو سەردانە لەچوارچێوەی رۆڵی ئیسلام ئاباد بووە بۆ کەمکردنەوەی گرژییەکان".
"ئێران بەرژەوەندیی نیشتمانی دەکاتە بنەما بۆ بڕیارەکانی و ملکەچی سەپاندنی داواکارییەکانی واشنتۆن نابێت". وتەبێژی وەزارەتی دەرەوەی ئێران وا دەڵێ