باڵیۆزخانەکانی ئەمریکا لە قودس (ئۆرشەلیم)، دەوحە و عەممان، هۆشداریی ئەمنیی جیایان بڵاوکردەوە و تێیدا هۆشدارییان دا لە ئاڵۆزیی دۆخی ئەمنیی ڕۆژهەڵاتی ناوەڕاست و ئەگەری پەرەسەندنی چاوەڕواننەکراوی گرژییەکان.
ئاوێنە: لەو هۆشدارییانەدا هاتووە "بەهۆی گرژییەکانی ڕۆژهەڵاتی ناوەڕاست، ژینگەی ئەمنیی هێشتا ئاڵۆزە و ئەگەری پەرەسەندنی چاوەڕواننەکراوی بارودۆخەکە هەیە".
هەروەها لای خۆیەوە، باڵیۆزخانەکانی ئەمریکا داوایان لە هاوڵاتیانی وڵاتەکەیان لە دەرەوە کردووە کە زیاتر "وشیار بن" و ئامادەکاری بکەن بۆ ئەگەری هەڵوەشاندنەوەی گەشتە ئاسمانییەکان، داخرانی کایەی ئاسمانی وڵاتان و پەککەوتنی پڕۆسەی گەشتکردن.
ئەم هۆشدارییانە لە کاتێکدا دێن کە فەرماندەیی ناوەندیی ئەمریکا (سێنتکۆم)، دەسپێکردنی هێرشی هێزەکانی ئەمریکای بۆ سەر ئامانجەکانی سوپای پاسداران لە ناو ئێران ڕاگەیاندووە. سێنتکۆم ئاشکرای کردووە کە ئەم هێرشانە لە کاتژمێر ١٢ی نیوەڕۆ بە کاتی ڕۆژهەڵاتی ئەمریکا دەستیان پێکردووە و وەک وەڵامێکە بۆ هەوڵەکانی ئەم دواییەی سوپای پاسداران بۆ هێرشکردنە سەر کەشتییە بازرگانییەکان لە گەرووی هورمز و هێزە ئەمریکییەکانی ناوچەکە.