ویلایەتە یەکگرتووەکانی ئەمریکا بۆ دووەم ڕۆژی لەسەریەک زنجیرەیەک هێرشی کردە سەر ئێران، لە بەرامبەردا تاران دەستپێکردنی ئۆپەراسیۆنێکی تۆڵەسەندنەوەی «یەکلاکەرەوە»ی ڕاگەیاند، سەرەڕای ئەوەی دۆناڵد ترەمپ سەرۆکی ئەمریکا هەڕەشەی وەشاندنی لێدانی «زۆر توندتر و بەهێزتر»ی لە ئێران کردووە.
ئاوێنە: فەرماندەیی ناوەندیی هێزەکانی ئەمریکا لە ڕۆژهەڵاتی ناوەڕاست (سێنتکۆم) ڕایگەیاند: «ئەمڕۆ هێزەکانی ئەمریکا لە کاتژمێر ١٢:٠٠ی نیوەڕۆ (١٦:٠٠ بە کاتی گرینچ) دەستیان کرد بە بۆردومانکردنی چەند ئامانجێکی سەر بە سوپای پاسداران لە ئێران». سێنتکۆم ئاماژەی بەوەش کرد کە ئەم لێدانانە وەک وەڵامێکە بۆ «هێرشەکانی ئەم دواییەی سوپای پاسداران بۆ سەر کەشتییە بازرگانییەکان لە گەرووی هورمز و بۆ سەر سەربازانی ئەمریکا کە لە ناوچەکەدا جێگیر کراون».
هاوکات دۆناڵد ترەمپ لە پۆستێکدا لە تۆڕی کۆمەڵایەتیی «ترووس سۆشیاڵ» جەختی لەوە کردەوە کە ئۆپەراسیۆنەکە «بەرفراوان و بەهێزە». ناوبراو هۆشداریشی دا کە «ئەگەر دەوڵەتی شکستخواردووی ئێران وەڵامی ئەم هێرشە بداتەوە—کە بە تەواوی ڕەوایەتیی هەیە—ئەوا ڕووبەڕووی لێدانێکی دیکەی زۆر توندتر و بەهێزتر دەبێتەوە». هەروەها جەختی کردەوە کە ئەگەر هەڕەشەکەی جێبەجێ بکات، «ئەوا تەنیا بەشێکی زۆر کەم لە کۆماری ئیسلامیی ئێران دەمێنێتەوە».
لە بەرامبەردا، سوپای پاسداران دەستبەجێ ڕایگەیاند کە ئێران وا لە ئەمریکا دەکات «پەشیمان ببێتەوە» لە هێرشە نوێکانی.
کەمێک پاش ئەوە، میدیاکانی ئێران بڵاویانکردەوە کە سوپای ئەو وڵاتە ئۆپەراسیۆنێکی یەکلاکەرەوەی دژی ئامانجەکانی ئەمریکا لە ناوچەکە دەستپێکردووە. ئاژانسی هەواڵی «تەسنیم» ڕایگەیاند: «ئۆپەراسیۆنێکی یەکلاکەرەوەی هێزە چەکدارەکانی ئێران لە وەڵامی دوژمنی ئەمریکیدا دەستیپێکرد، مووشەک و فڕۆکە بێفڕۆکەوانەکانی ئێران بنکە و بەرژەوەندییەکانی ئەمریکا لە ناوچەکە دەکەنە ئامانج». هاوکات ئاژانسی «فارس» ڕایگەیاند کە «مووشەک و درۆن لە ئێرانەوە ئاراستەی ئامانجی ڕانەگەیەندراو کراون»، لە کاتێکدا تەلەڤزیۆنی ئوردن بڵاویکردەوە کە زەنگی ئاگادارکردنەوە لە وڵاتەکەدا لێدراوە.