سەرۆک کۆماری ئێران سەرەخۆشی لە خەڵکی کوردستان دەکات بە هۆی ڕووداوە سەختەکەی کە دوێنێ لە ڕێگەی سنە ڕوویدا.
ئەمڕۆ یەکشەممە، مەسعود پزیشکیان، سەرۆک کۆماری ئێران پەیامێکی بە بۆنەی ڕووداوە سەختەکەی ڕێگەی سنە بڵاوکردەوە و ڕایگەیاند، رووداوی تاڵی تەقینەوەی تانکەری سووتەمەنی لە ڕێگای سنە – هەمەدان و گیانلەدەستدانی ژمارەیەک لە هاووڵاتیانی ئازیزمان بووە هۆی خەمێکی قووڵ.
سەرۆکی ئێران دەڵێت: “لە کاتێکدا پرسە و سەرەخۆشی خۆم ئاراستەی بنەماڵە خەمبارەکان و خەڵکی کوردستان دەکەم، پێویستە بەرپرسانی پەیوەندیدار بەپەلە چارەسەرکردنی بریندارەکان، پاڵپشتیکردنی بنەماڵەکان و لێکۆڵینەوەی ورد لە هۆکارەکانی ئەم کارەساتە بخەنە لە پێشینەی کارەکانیان”.
دوێنی ئێوارە تانکەرێکی سووتەمەنی لە ڕێگەی سنە-هەمەدان تەقییەوە کە گیانلەدەستدانی 11 هاووڵاتی و برینداربوونی ژمارەیەکی دیکەی لێکەوتەوە.
بە هۆی ڕووداوەکەوە ئەمڕۆ و سبەینێ لە شاری سنە ماتەمینی ڕاگەیەندرا.
