چوارچێوەی هەماهەنگی شهوی دوشهممه تاوتوێی كۆمهڵێك پرسی كرد لهنێویاندا پڕۆژه یاساکانی دەستەی حەشدی شەعبی، نەوت و گاز و دادگای فیدراڵی، هاوکات بڕیاریدا لهسهر بهردهمیدان به تەواوکردنی پێکهێنانی كابینهی حکومەت.
ئاوێنه: لە ڕاگەیەندراوێکی چوارچێوەی هەماهەنگیدا هاتوه "چوارچێوەی هەماهەنگی کۆبونەوەی ئاسایی خۆی لە نوسینگەی حەیدەر عەبادی ئهنجامداو کۆمەڵێک دۆسیەی سیاسی و تهشریعی كه ئهولهوییهتیان ههیه، تاوتوێ کرد."
بهپێی راگهیهندراوهكه "ئامادەبوانی كۆبونهوه، یاسای دەستەی حەشدی شەعبی و گرنگی تەواوکردنی پەسەندکردنییان تاوتوێ کرد کە کارەکانی دەستەکە ڕێکدەخات و ڕۆڵی لە ناو دامەزراوەکانی دەوڵەتدا بەهێز دەکات، لەگەڵ تاوتوێکردنی کۆمەڵێک یاسای سهرهكی دیكه لهپێش ههمویانهوه یاسای نەوت و غاز، یاسای دادگای فیدراڵی و یاسای ئەنجومەنی فیدراڵی، بە شێوەیەک کە هاوکار بێت لە تەواوکردنی بونیادنانی دەستوری و دامەزراوەیی دەوڵەتدا."
له راگهیهندراوهكهدا هاتوه، "لە دۆسیەی پێکهێنانی كابینهی حکومەتدا، چوارچێوەی هەماهەنگی بەدواداچونی بۆ گفتوگۆ بەردەوامەکان کرد و جەختی لەسەر پێویستیی یەکلاییکردنەوەی دۆسیەکە کردەوە، و بڕیاریدا بەردەوام بێت لە دەستنیشانکردنی ئهو وهزیرانهی ماون بۆ تەواوکردنی پێکهێنانی كابینهی حکومەت و ڕەخساندنی دەرفەت تا ئەرکەکانی جێبەجێ بکات."
ئاماژهی بهوهشدراوه،"هەروەها کۆبونەوەکە ڕێکخستنی کارە ناوخۆییەکانی چوارچێوەی هەماهەنگی تاوتوێ کرد، لەگەڵ جەختکردنەوە لەسەر دانانی پەیرەو و ڕێسایەک کە میکانیزمەکانی کار و بڕیاردان ڕێکبخات، بە شێوەیەک کە دامەزراوەییبون و یەکههڵوێستی بەهێز بکات."