کازم فەرتوسی، وتەبێژی کەتیبەکانی سەیدولشوهەدا—کە یەکێکە لە گرووپە دیارەکانی بەرەی بەرگری (مقاوەمە)—لە نوێترین چاوپێکەوتنیدا ڕایگەیاند کە ئەوان و گرووپەکانی دیکەی هاوپەیمانیان پرۆسەی ڕێکخستنەوەی چەک ڕەت دەکەنەوە، تا ئەو کاتەی کۆمەڵێک داواکاری و مەرجی سەرەکییان جێبەجێ دەکرێت.
ئاوێنە: بەپێی وتەکانی فەرتوسی، مەرجە سەرەکییەکانی بەرەی بەرگری بۆ دەستپێکردنی ڕێکخستنەوەی چەک بریتیین لە:
کشانەوەی هێزە بیانییەکان: چوونەدەرەوەی تەواوەتی هێزەکانی ئەمریکا و تورکیا لە خاکی عێراق.
کۆتاییهێنان بە هەژموونی دەرەکی: نەمانی دەستوەردان و هەژموونی سیاسی و دارایی ئەمریکا بەسەر جومگەکانی بڕیار لە عێراقدا.
ڕێکخستنەوەی سەربازی: هەڵوەشاندنەوەی هێزی پێشمەرگە و بڵاوەپێکردنی سوپای عێراق لە ناوچەکانی هەرێمی کوردستان.
لە بەشێکی دیکەی قسەکانیدا، وتەبێژی کەتیبەکانی سەیدولشوهەدا ئاماژەی بەوە دا کە گومانیان لە ڕاگەیەندراوەکانی تایبەت بە کشانەوەی ئەمریکا هەیە. ناوبراو جەختی کردەوە کە پێشتریش چەندین جار باسی کشانەوەی هێزەکانی ئەمریکا کراوە، بەڵام لە واقیعدا نەکشاونەتەوە و بەردەوام لە عێراقدا ماونەتەوە.