سەرۆکی ئەرکانی وەزارەتی پێشمەرگە پێشوازی لە فەرماندەی هێزەکانی ئەڵمانیا لە هەرێمی کوردستان کرد و لە کۆبوونەوەیەکدا تیمی ڕاوێژکارانی بەرلین سەرۆکی ئەرکانیان لە کۆتایهاتنی ماوەی ئەرکەکانیان لە هەرێمی کوردستان ئاگادار کردەوە.
ئاوێنە: بەشی راگەیاندنی وەزارەتی پێشمەرگە لە راگەیەندراوێکدا دەڵێت "ئەمڕۆ ٨ی ئەیلولی ٢٠٢٦، فەریق روکن عیسا عوزێر سەرۆکی ئەرکانی وەزارەتی پێشمەرگە، لە دیوانی وەزارەت، پێشوازی لە کۆڵۆنێڵ ئۆستن پیچا، فەرماندەی هێزەکانی ئەڵمانیا لە هەرێمی کوردستان و مێجەر لویزیا، ڕاوێژکاری هێزەکانی ئەڵمانیا و شاندێکی یاوەریان کرد".
ئەوەش هاتووە "لە دیدارێکدا، تیمی ڕاوێژکارانی ئەڵمانیا سەرۆکی ئەرکانیان لە کۆتایهاتنی ماوەی ئەرکەکانیان لە هەرێمی کوردستان ئاگادار کردەوە، پاشان شێوازی کۆتایهاتنی ئەرکەکان، ئاستی پەیوەندییە سەربازییەکان، پرۆسەی ڕێکخستنەوەی هێزەکانی پێشمەرگە و بەردەوامیی پشتیوانیەکان گفتوگۆیان لەبارەیەوە کرا".
وەزارەتەکە راشیگەیاندووە "سەرۆکی ئەرکان سوپاس و پێزانینی ئاراستەی فەرماندە و ڕاوێژکارە سەربازییەکانی سوپای ئەڵمانیا کرد بۆ هەوڵ و پشتیوانیە بەردەوامەکانیان لە گەڵ هێزی پێشمەرگەی کوردستان، وێڕای هیوای سەرکەوتن، جەختی کردەوە کە گەل و حکومەتی ئەڵمانیا هەمیشە وەک دۆستێکی نزیکی پێشمەرگە دەبینرێن".
لە بەشێکی دیکەی کۆبوونەوەکەدا، سەرۆکی ئەرکان ڕۆڵی بەرچاو و گرنگی وڵاتی ئەڵمانیای لە چوارچێوەی هاوپەیمانیی نێودەوڵەتیی دژی داعش بەرز نرخاند، بەتایبەت لە بوارەکانی پێشکەشکردنی هاوکاریی تەندروستی، پاڵپشتیی لۆجستی و مەشق و ڕاهێنان بە هێزەکانی پێشمەرگە، کە کاریگەریی ڕاستەوخۆیان لە بەهێزکردنی توانا سەربازییەکانی پێشمەرگەدا هەبووە.
لە کۆتایی دیدارەکەدا، بەردەوامی و پێشخستنی هەماهەنگی و هاوکارییەکانی نێوان تیمی ڕاوێژکارانی سوپای ئەڵمانیا و هێزی پێشمەرگەی کوردستان دووپات کرایەوە، هەروەها هەردوولا خواستی خۆیان بۆ بەردەوامیدان و فراوانترکردنی زیاتری پەیوەندییە دوولایەنەکان دەربڕی.