ڕۆژی چوارشەممە، هێزەکانی سەر بە بزووتنەوەی ئەنساروڵڵا (حوسییەکانی یەمەن)، بەرپرسیارێتی خۆیان لە ئەنجامدانی هێرشێک بۆ سەر کۆمپانیای ئارامکۆ لە ناوچەی یەنبوع و بنکەی ئاسمانیی خەمیس موشەیت لە عەرەبستانی سعودیە ڕاگەیاند.
ئاوێنە: لەوبارەیەوە، یەحیا سەریع، وتەبێژی هێزەکانی حوسییەکان لە لێدوانێکدا ڕایگەیاند کە هێزەکانیان دوو ئۆپەراسیۆنی سەربازیی گەورەیان ئەنجامداوە. ئاماژەی بەوەشکرد، لە ئۆپەراسیۆنی یەکەمدا لە ڕێگەی دەیان موشەکی بالیستی و فڕۆکەی بێفڕۆکەوانەوە کۆمپانیای ئارامکۆیان لە شاری یەنبوع کردووەتە ئامانج، کە بە گوتەی ئەو بووەتە هۆی کەوتنەوەی ئاگرێکی گەورە و وێرانکارییەکی بەرفراوان.
هەروەها ئەوەشی خستەڕوو کە لە ئۆپەراسیۆنی دووەمدا، بە چەندین موشەکی بالیستی هێرشیان کردووەتە سەر بنکەی ئاسمانیی خەمیس موشەیت لە ناوخۆی سعودیە و جەختی لەوە کردەوە کە هێرشەکان ئامانجەکانی خۆیان بە وردی پێکاوە.
لە کۆتایی لێدوانەکەیدا، وتەبێژی حوسییەکان هۆشداری دا لەوەی کە هێزەکانیان بەردەوام دەبن لە ئۆپەراسیۆنە سەربازییەکانیان بەرەو قووڵایی خاکی سعودیە و بە ئامانجگرتنی بنکە و کۆبوونەوە سەربازییەکانی ئەو وڵاتە. ناوبراو ڕوونیکردەوە کە ئەم هەنگاوانە بۆ چەسپاندنی هاوکێشەی "گەمارۆ بەرامبەر گەمارۆ"یە، و جەختی کردەوە کە ئەم هێرشانە بەردەوام دەبن تا ئەو کاتەی ئۆپەراسیۆنە سەربازییەکانی سعودیە دەوەستن و گەمارۆی سەر یەمەن کۆتایی دێت.