بەپێی ڕاپۆرتێکی ئاژانسی فرانس پرێس، ئیدارەی ئەمریکا بە فەرمی دانی بەوەدا ناوە کە لە ماوەی بڵاوەپێکردنی کەشتیی فڕۆکەهەڵگری "ئەبراهام لینکۆڵن" لە ڕۆژهەڵاتی ناوەڕاست و لە میانەی جەنگ و گرژییەکانی پەیوەست بە ئێران، ٨ هەوڵی خۆکوشتن لە نێوان سەربازانی کەشتییەکەدا تۆمارکراون.
ئاوێنە: لە نامەیەکی فەرمیدا کە ئاراستەی سیناتۆر کیرستن گیلیبراند کراوە، هونگ کاو، وەزیری هێزی دەریایی ئەمریکا بە وەکالەت، ئاشکرایکرد کە سەربازانی سەر کەشتییەکە بەهۆی مانەوەی زۆریان لەناو دەریادا ڕووبەڕووی گرفتی دەروونی بوونەتەوە. ناوبراو ڕوونیکردەوە کە یەکێک لە ڕووداوەکان لە سەرەتای مانگی ئابدا ڕوویداوە، کاتێک سەربازێک خۆی فڕێداوەتە ناو دەریاوە، بەڵام دواتر لەلایەن تیمەکانەوە ڕزگار کراوە.
هونگ کاو لە نامەکەیدا جەختی لەوە کردووەتەوە: "تا ئێستا ٨ هەوڵی خۆکوشتنمان هەبووە، بەڵام خۆشبەختانە هیچ کامێکیان نەبوونەتە هۆی گیانلەدەستدان. ئێمە لە ئێستادا کار دەکەین بۆ باشترکردنی ڕەوشی تەندروستی و دەروونیی تەواوی تیمەکەمان لەسەر کەشتییەکە."
سەبارەت بە جووڵەی کەشتییەکە، ئەبراهام لینکۆڵن لە مانگی تشرینی دووەمی ساڵی ٢٠٢٥ لە ویلایەتی کالیفۆرنیاوە بەرەو دەریای چینی باشوور بەڕێکەوتبوو. بەڵام پێش دەستپێکردنی هێرشەکانی ئەمریکا بۆ سەر ئێران لە مانگی شوباتی ٢٠٢٦، ئاراستەکەی بەرەو ناوچەکانی ڕۆژهەڵاتی ناوەڕاست گۆڕدرا.
ئەوەی جێگەی سەرنجە، ئەم کەشتییە بۆ ماوەی ٢٨٦ ڕۆژ بەبێ پچڕان لەناو دەریادا ماوەتەوە، ئەمەش وایکردووە سەربازەکان دەستیان بە وشکانی و خۆراکی تازە (فرێش) نەگات، کە بووەتە هۆکاری سەرهەڵدانی کێشەی تەندروستی و بێزاری لە نێوانیاندا. پێشتر، ڕاپۆرتەکانی پەیوەست بە خراپیی ڕەوشی ناو کەشتییەکە لەلایەن دۆناڵد ترەمپ و وەزیری بەرگرییەکەیەوە ڕەتکرابوونەوە و وەک "زانیاریی چەواشەکارانە" وەسفکرابوون.
کەشتیی فڕۆکەهەڵگری ئەبراهام لینکۆڵن یەکێکە لە گەورەترین کەشتییە جەنگییەکانی ئەمریکا و نزیکەی ٥ هەزار سەرباز لەخۆدەگرێت. ئەم بارودۆخە و مانەوەی زیاتر لە ٢٠٠ ڕۆژ لە دەریادا بەبێ بینینی وشکانی، کاردانەوەی فراوانی لەناو کۆنگرێسی ئەمریکا لێکەوتووەتەوە. ئەم پەرەسەندنانە لە کاتێکدان کە لە ساڵانی دواییدا، ئامارەکانی خۆکوشتن لە ڕیزەکانی سوپای ئەمریکادا ڕووی لە زیادبوون کردووە، ئەمەش وەک مەترسییەکی گەورە بۆ سەر ئامادەیی و توانای سەربازیی واشنتن لە کاتی قەیرانە نێودەوڵەتییەکاندا سەیر دەکرێت.