حکومەتی عێراق لە چوارچێوەی ئامادەکارییەکان بۆ پڕۆژەیاسای بودجەی گشتیی ساڵی ٢٠٢٧، بڕیاریدا زیاتر لە ٥٠٠ هەزار کارمەندی گرێبەست و کرێکاری ڕۆژانە بکاتە فەرمانبەری هەمیشەیی، هاوکات ١٢٠ هەزار پلەی نوێی وەزیفیش بەشێوەی گرێبەست لە سەرجەم کەرتەکاندا دابمەزرێنێت.
ئاوێنە: حەیدەر عەبودی، وتەبێژی حکومەتی عێراق لە لێدوانێکدا بۆ ئاژانسی هەواڵی فەرمیی وڵاتەکەی ئاشکرای کرد، لەسەر بنەمای ڕێنماییەکانی عەلی زەیدی، سەرۆک وەزیرانی عێراق، لە ڕەشنووسی بودجەی ساڵی ٢٠٢٧دا تەرخانکردنی دارایی پێویست بۆ گۆڕینی ناونیشانی زیاتر لە ٥٠٠ هەزار فەرمانبەری گرێبەست و کرێکاری ڕۆژانە جێگیر کراوە، بە مەبەستی جێگیرکردنیان وەک فەرمانبەری هەمیشەیی لە دامەزراوەکانی دەوڵەتدا.
سەبارەت بە ڕەخساندنی دەرفەتی کاری نوێ، وتەبێژی حکومەت ڕوونی کردەوە کە هەمان پڕۆژەیاسا ١٢٠ هەزار پلەی دامەزراندنی نوێ بە شێوەی گرێبەست لەخۆدەگرێت. بەپێی پلانە حکومییەکە، دابەشکاریی ئەو پلە وەزیفییانە بە جۆرێک دەبێت کە ٥٠ هەزار پلەیان بۆ دەزگا ئەمنییەکان و ٧٠ هەزارەکەی دیکەشیان بۆ وەزارەتەکان و پارێزگا جیاوازەکان تەرخان دەکرێت.
لەبارەی میکانیزمی وەرگرتنی فەرمانبەرە نوێیەکانەوە، حەیدەر عەبودی ئاماژەی بەوە دا: "پرۆسەی پێشکەشکردنی داواکاری بۆ ئەو ١٢٠ هەزار پلە نوێیە، بە شێوەیەکی ناوەندی و لە ڕێگەی پلاتفۆرمێکی ئەلیکترۆنیی تایبەتەوە بەڕێوەدەچێت، ئەمەش وەک هەنگاوێک بۆ مسۆگەرکردنی شەفافیەت و چەسپاندنی دادپەروەری لەنێوان سەرجەم پێشکەشکاراندا."
بڕیارە لە هەنگاوی داهاتوودا، ڕەشنووسی تەواوەتیی پڕۆژەیاسای بودجەی ٢٠٢٧ لە دانیشتنێکی تایبەتی ئەنجومەنی وەزیرانی عێراقدا تاوتوێ بکرێت و دوای پەسەندکردنی، بە فەرمی ڕەوانەی ئەنجومەنی نوێنەران بکرێت بە مەبەستی گفتوگۆکردن و دەنگدان لەسەری.
ئەم هەنگاوەی حکومەتی عێراق بۆ فراوانکردنی میلاکاتی دەوڵەت لە کاتێکدایە، کەرتی گشتی بە سەرەکیترین سەرچاوەی دابینکردنی هەلی کار لە وڵاتەکەدا هەژمار دەکرێت و لە ئێستادا زیاتر لە ٤ ملیۆن فەرمانبەر مووچەی مانگانە لە دەوڵەت وەردەگرن. ئەم ژمارە زۆرەی مووچەخۆران وایکردووە زیاتر لە ٧٠%ی کۆی خەرجییەکانی بودجەی گشتیی عێراق بۆ مووچە و شایستە داراییەکان تەرخان بکرێت.
بڕیاری بەهەمیشەییکردنی گرێبەستەکان و ڕاگەیاندنی دامەزراندنی نوێ، لە دوای زنجیرەیەک داواکاری و خۆپیشاندانی بەردەوامی دەرچووانی زانکۆ و پەیمانگاکان دێت لە شارە جیاوازەکانی عێراقدا. لە بەرامبەردا، ئەم بڕیارانە هاوکاتن لەگەڵ هۆشدارییە بەردەوامەکانی سندوقی دراوی نێودەوڵەتی (IMF) سەبارەت بە مەترسییەکانی هەڵاوسانی خەرجییە بەکارخەرەکانی دەوڵەت و پشتبەستنی نزیکەی تەواوەتیی ئابووریی عێراق بە داهاتی فرۆشتنی نەوت.