​بە پەیامێکی خامنەییەوە.. قائانی بۆ ڕێگریکردن لە پێکدادانی چەکداری دەگاتە بەغدا
  2026-11-17     

بەپێی زانیارییەکانی سەرچاوەیەکی سیاسیی ئاگادار، ئەمڕۆ سێشەممە ئاشکرا کراوە کە ئیسماعیل قائانی، فەرماندەی فەیلەقی قودسی سوپای پاسدارانی ئێران، وەک نێردراوی موجتەبا خامنەیی، ڕێبەری باڵای ئێران، بە سەردانێکی بەپەلە گەیشتووەتە بەغدا. ئامانجی سەرەکیی ئەم سەردانە، هەوڵدانە بۆ کۆنتڕۆڵکردنی ئەو گرژییانەی لە نێوان عەلی زەیدی، سەرۆک وەزیرانی عێراق و کەتائیبی حزبوڵا سەبارەت بە ناوچەی جورف سەخەر دروست بوون، ئەمەش لەپێناو ڕێگریکردن لە تەقینەوەی دۆخەکە و دروستبوونی هەر ڕووبەڕووبوونەوەیەکی سەربازیی نێوان هەردوولا.

ئاوێنە: ​سەرچاوەکە ئاماژەی بەوە کردووە کە قائانی شەوی ڕابردوو گەیشتووەتە پایتەختی عێراق و دەستبەجێ چەندین کۆبوونەوەی ئەنجامداوە. جگە لە دیدارەکانی لەگەڵ سەرکردەکانی چوارچێوەی هەماهەنگی، لەگەڵ بەرپرسانی گروپە چەکدارەکان و ژمارەیەک کەسایەتیی دیاری بەغداش کۆبووەتەوە. تەوەری سەرەکیی ئەم گفتوگۆیانە، تاوتوێکردنی پێشهاتەکانی قەیرانی جورف سەخەر و ئەو وادەیە بووە کە سەرۆک وەزیران بۆ کەتائیبی حزبوڵای دیاری کردووە.

​لە میانی کۆبوونەوەکاندا، قائانی بە بەشداربووانی ڕاگەیاندووە کە ئەو "نێردراوی ڕێبەری باڵای ئێرانە و ئەرکێکی دیاریکراوی پێسپێردراوە بۆ کۆتاییهێنان بەم قەیرانە، هەروەها نایەوێت بەبێ گەیشتن بە چارەسەرێک بگەڕێتەوە تاران." ناوبراو داوای هێورکردنەوەی دۆخەکەی کردووە و پێشنیازی کردووە فشاری سیاسی بخرێتە سەر سەرۆک وەزیران، بۆ ئەوەی بژاردەی سەربازی دژی گروپە چەکدارەکان بەکارنەهێنرێت.

​سەرەڕای ئەم هەوڵانە، بە وتەی سەرچاوەکە، تا ئێستا نێوەندگیرییەکانی چەند کاتژمێری ڕابردووی فەرماندەی فەیلەقی قودس هیچ پێشکەوتنێکی ئەوتۆی بەدەست نەهێناوە. هۆکارەکەشی بۆ ئەوە دەگەڕێتەوە کە عەلی زەیدی بە توندی سوورە لەسەر هەڵوێستەکەی و تەواوی ئەو فشارانە ڕەتدەکاتەوە کە دەیانەوێت ڕێگری لە سەپاندنی دەسەڵاتی هێزەکانی حکومەت بەسەر تەواوی ناوچەی جورف سەخەردا بکەن.

​سەرچاوەکە ئەوەشی ڕوون کردووەتەوە، لە ئێستادا قائانی بەغدای جێهێشتووە بەڵام هێشتا لە ناوخۆی عێراقە، و ئامادەکاری دەکرێت بۆ ئەنجامدانی کۆبوونەوەی نوێ لەگەڵ سەرکردە سیاسییەکان و گروپە چەکدارەکان، بە مەبەستی لێکنزیککردنەوەی بۆچوونەکان و دوورخستنەوەی مەترسیی پێکدادانی چەکداری کە ئەگەری هەیە کاریگەرییەکانی بۆ ناوچەکانی دیکەش تەشەنە بکات.

​لەسەر هەمان پرس، سەرچاوەیەک لە ناو چوارچێوەی هەماهەنگی ڕایگەیاندووە کە قائانی ڕووی لە پارێزگای نەجەف کردووە. لەوێ لەگەڵ کەسایەتییە ئایینییەکان کۆبووەتەوە بۆ ئەوەی گوێ لە بۆچوونی ئەو لایەنانە بگرێت کە لە مەرجەعیەتی ئایینییەوە نزیکن سەبارەت بە قەیرانەکە.

​هاوکات، سەرلەبەیانی ئەمڕۆ سێشەممە، ژمارەیەک کەسایەتی بۆ تاوتوێکردنی بژاردەکانی بەردەم چارەسەرکردنی گرژییەکان و دیداری قائانی، گەیشتوونەتە نەجەف. ئەمەش هاوکاتە لەگەڵ سەردانەکەی عەلی زەیدی، سەرۆک وەزیران بۆ هەمان پارێزگا، کە بە مەبەستی کردنەوەی پردی ئیمام عەلی و بەڕێوەبردنی کۆبوونەوەی هەفتانەی ئەنجومەنی وەزیران ئەنجامی داوە.

​یەکێک لەو پێشنیازانەی لە ئێستادا وەک چارەسەر خراوەتە ڕوو، بریتییە لە جێگۆڕکێپێکردنی هێزەکانی کەتائیبی حزبوڵا لە جورف سەخەر بە لیواکانی حەشدی شەعبی و هێزەکانی پۆلیسی فیدراڵی، تاوەکو ببنە پاڵپشت بۆ هێزەکانی دەزگای دژە تیرۆر. ئەمەش لە کاتێکدایە کە لێکۆڵینەوەکانی حکومەت سەبارەت بە دۆسیەی قاچاخچێتیی نەوت لە ناوچەکە بەردەوامییان هەیە.

​پاشخانی قەیرانەکە:

سەردانە کتوپڕەکەی قائانی ڕاستەوخۆ دوای کۆبوونەوەیەکی ئاڵۆز و پڕگرژی دێت کە ئێوارەی ڕۆژی دووشەممە لە نێوان سەرکردەکانی چوارچێوەی هەماهەنگی و سەرۆک وەزیران بەڕێوەچوو. ئەو کۆبوونەوەیە بەبێ هیچ ڕێککەوتنێک لەسەر دۆخی جورف سەخەر کۆتایی هات، لە سایەی هەبوونی ناکۆکییەکی قووڵ لەسەر ئەو وادەیەی حکومەت دیاری کردووە و لێکەوتەکانی هەر ئۆپەراسیۆنێکی سەربازیی پێشبینیکراو.

​شەوی ڕابردوو، عەلی زەیدی بە ڕوونی سەرکردەکانی چوارچێوەی هەماهەنگی ئاگادار کردووەتەوە کە پێداگرە لەسەر گەڕاندنەوەی کۆنترۆڵی تەواوەتی قەزاکە بۆ ژێر دەسەڵاتی حکومەت. ناوبراو ڕەتیکردووەتەوە ئەو وادەیە درێژ بکاتەوە کە ئێوارەی هەینیی داهاتوو کۆتایی دێت، و هۆشداریشی داوە کە ئەگەر داواکارییەکانی حکومەت جێبەجێ نەکرێن، هێزە ئەمنییەکان لەوپەڕی ئامادەباشیدان بۆ ئەنجامدانی ئۆپەراسیۆنێکی سەربازی لە ناوچەکە.

زۆرترین بینراو
لە سلێمانی دەست بەسەر کێڵگەیەکی برنجدا گیرا
تا کارلەکار نەترازاوە ناوی خوا بهێنن و ئارامبگرن...
عەگید کەلاری: گەلی کورد دوو ئیدارەیی قبوڵ ناکات و پارچەبوون پارتی و یەکێتیش دەڕوخێنێت
چوارچێوه‌ی هه‌ماهه‌نگی: میوانداری وه‌فدێكی سلێمانیمان كرد كه‌ پێكهاتبون له‌ نزار ئامێدی، بافڵ تاڵه‌بانی و شاسوار عه‌بدولواحید
حکومەتی عێراق: مۆڵەت دراوە کەتیبەکانی حزبوڵڵا جورف سەخر چۆڵ بکەن و ئەگەری هەیە سوپا بچێتە هەرێمی کوردستان
عێراق بڕیاریدا به‌ راگرتنی ته‌له‌گرام و هه‌رێم ده‌ڵێت: هیچ نوسراوێكی ره‌سمیمان پێنه‌گه‌یشتوه‌
نوسینگەی سەرۆکی کۆمەڵ: عەلی باپیر ڕەتینەکردوەتەوە پێشوازی لە شاسوار عەبدولواحید بکات
رۆیته‌رز: بۆرییه‌كه‌ی جورف سه‌خر كون كراوه‌و له‌ 2021ه‌وه‌ به‌ به‌های سه‌دان ملیۆن دۆلار نه‌وتی لێبراوه‌
عه‌لی حه‌مه‌ساڵح: ده‌سه‌ڵاتدارانی هه‌رێم له‌ ترسی عێراق، باری قاچاخ و تانكه‌ریان راگرت
سەعدی پیرە لەبارەی دووئیدارەیی: ئەوە هەوڵێکی کەمی بافڵ تاڵەبانییە بۆ ئەو کردە نادروستە
© 2026 Awene Online, Inc. All Rights Reserved.
×