ئەلحورە: زەیدی و قائانی لەسەر کشانەوەی حزبوڵڵا لە جرف لسخر رێککەوتن
  2026-11-17     
ئیسماعیل قائانی، فەرماندەی هێزی قودسی سوپای پاسدارانی ئێران

ماڵپەڕی حوڕە لەزاری چەند سەرچاوەیەک لەچوارچێوەی هەماهەنگیی لە عێراق ئاشکرایکرد، عەلی زەیدی، سەرۆکوەزیرانی عێراق و ئیسماعیل قائانی، فەرماندەی هێزی قودسی سوپای پاسدارانی ئێران، گەیشتوونەتە ڕێککەوتنێک کە کەتائبی حزبوڵڵا لە ناوچەی جرف لسەخر "بەم نزیکانە" دەکشێتەوە؛ ئەمەش بۆ ڕێگریکردنە لە ئۆپەراسیۆنێکی سەربازی کە حکومەتی عێراق خۆی بۆ ئەنجامدانی لە ناوچەکەی سەربە پارێزگای بابل ئامادە کردبوو.

 

ئاوێنە: بەپێی وتەی ئەو سەرچاوانەی کە بۆ حوڕە قسەیان کردووە، قائانی شەوی دووشەممە گەیشتووەتە بەغدا و هێشتا لەوێیە. ئەو لەگەڵ زەیدی کۆبووەتەوە و کۆبوونەوەکە تا کاتژمێر چوارەی بەیانیی ڕۆژی سێشەممە درێژەی کێشاوە.

لەسەر ڕێککەوتنەکان، سەرچاوەکان وتیشیان "پێشنیاری رێککەوتنەکە بریتییە لە چوونەناوەوەی هێزێکی هاوبەش، پێکهاتوو لە هێزەکانی حەشدی شەعبی و هێزە ئەمنییەکان، بۆ ناوچەی جرف لسەخر بەمەبەستی سەپاندنی دەسەڵاتی حکومەت؛ لەبەرامبەردا کەتائبی حزبوڵڵا لە ناوچەکە دەکشێتەوە".

حوڕە ئاماژەی بەوەشداوە، کەتائبی حزبوڵڵا یەکێکە لە بەهێزترین گرووپە چەکدارەکانی عێراق کە پشتگیریی ئێرانیان هەیە. ئەمەش هۆکاری جووڵەی قائانییە، کە فەرماندەی هێزی قودسی سوپای پاسدارانە و ئەم هێزە لەلایەن ئەمریکاوە بە ڕێکخراوێکی تیرۆریستی پۆلێن کراوە.

هەروەها حکومەتی عێراق کەتائبی حزبوڵڵا تۆمەتبار دەکات بە قاچاغبردنی نەوت لە بۆرییەکانی ناوچەی جرف لسەخر. ئەمە دوای ئەوە بوو کە لیژنەیەکی لێکۆڵینەوە ڕاپۆرتێکی هەواڵگریی وەزارەتی ناوخۆی پشتڕاستکردەوە؛ لە دۆزینەوەی دزیی نەوت لە بۆڕییەکانی وەزارەتی نەوت لە ناوچەکە لە ساڵی ٢٠٢١ەوە تۆمار کردبوو. ئەم بابەتەش بووە هۆی جووڵەی حکومەت بۆ چوونەناوەوەی ناوچەکە.

کۆبوونەوەی زەیدی و قائانی چەند کاتژمێرێک دوای ئەوە هات کە کەسایەتییەکانی چوارچێوەی هەماهەنگی شەوی دووشەممە هەڕەشەیان لە زەیدی کردبوو کە ئەگەر هێزە ئەمنییەکان هێرش بکەنە سەر جرف لسەخر، ناوچەی سەوزی بەغدا بە مووشەک و فڕۆکەی بێفڕۆکەوان دەکەنە ئامانج. دوو سەرچاوە، یەکێکیان ئەمنی و ئەوی دیکە سیاسی، ئەم هەڕەشەیەیان بۆ حوڕە ئاشکراکردووە.

بەپێی قسەی ئەو دوو سەرچاوەیە، نوێنەرایەتییە دیپلۆماسییەکان لە بەغدا لە هەڕەشەکان ئاگادار کراونەتەوە و هەنگاوی پێویستیان بۆ پاراستنی خۆیان ناوە.
 

زۆرترین بینراو
لە سلێمانی دەست بەسەر کێڵگەیەکی برنجدا گیرا
چوارچێوه‌ی هه‌ماهه‌نگی: میوانداری وه‌فدێكی سلێمانیمان كرد كه‌ پێكهاتبون له‌ نزار ئامێدی، بافڵ تاڵه‌بانی و شاسوار عه‌بدولواحید
حکومەتی عێراق: مۆڵەت دراوە کەتیبەکانی حزبوڵڵا جورف سەخر چۆڵ بکەن و ئەگەری هەیە سوپا بچێتە هەرێمی کوردستان
تا کارلەکار نەترازاوە ناوی خوا بهێنن و ئارامبگرن...
عێراق بڕیاریدا به‌ راگرتنی ته‌له‌گرام و هه‌رێم ده‌ڵێت: هیچ نوسراوێكی ره‌سمیمان پێنه‌گه‌یشتوه‌
نوسینگەی سەرۆکی کۆمەڵ: عەلی باپیر ڕەتینەکردوەتەوە پێشوازی لە شاسوار عەبدولواحید بکات
عەگید کەلاری: گەلی کورد دوو ئیدارەیی قبوڵ ناکات و پارچەبوون پارتی و یەکێتیش دەڕوخێنێت
رۆیته‌رز: بۆرییه‌كه‌ی جورف سه‌خر كون كراوه‌و له‌ 2021ه‌وه‌ به‌ به‌های سه‌دان ملیۆن دۆلار نه‌وتی لێبراوه‌
عه‌لی حه‌مه‌ساڵح: ده‌سه‌ڵاتدارانی هه‌رێم له‌ ترسی عێراق، باری قاچاخ و تانكه‌ریان راگرت
شەپۆلێکی بارانبارین و سەرما ڕوو لە هەرێمی کوردستان و عێراق دەکات
© 2026 Awene Online, Inc. All Rights Reserved.
×