قوباد تاڵەبانی، كوڕی جەلال تاڵەبانی، سەرۆك كۆماری پێشوتری عێراق، لەنامەیەكدا بۆ باوكی بە بۆنەی سێیەم ساڵیادی كۆچی دواییەوە، رایدەگەیەنێت: كوردستان وەك سەردەمی تۆ نەماوە، بارودۆخ خراپەو گوزەرانی خەڵك باش نییە. بەڵێنیش بە باوكی دەدات لەسەر رێبازەكەی ئەو بەردەوام بێت،"هەرچەندە لەلایەن خەڵکانێکی مافیائاساو پیسخۆر و گەندەڵەوە رێگری زۆر دەخرێتە بەردەمم."

ئاوێنە: قوباد تاڵەبانی، لەنامەكەیدا كە لەڕێگەی هەژمارەكانی خۆی لە فەیسبوك و ئینستاگرام بڵاویكردۆتەوە دەڵێت"باوکە گیان سڵاو...چەند رۆژێکە بیر لەوە دەکەمەوە هاتمە خزمەتت چیت پێ بڵێم و چیت بۆ باس بکەم! کوردستان وەک سەردەمی تۆ نەماوە؛ بارودۆخ خراپە و گوزەرانی خەڵك باش نییە."

قوباد تاڵەبانی وتوشیەتی"ئێستا کە سێ ساڵ بەسەر ژیانئاوایی تۆدا تێپەڕدەبێت بەڵێنت پێ دەدەم تا مردن لەسەر رێبازی تۆ بەردەوام دەبم. هەرچەندە لەلایەن خەڵکانێکی مافیا ئاسا و پیسخۆر و گەندەڵەوە رێگری زۆر دەخرێتە بەردەمم، بەڵام دڵنیات دەکەمەوە بە هەموو توانامەوە هەوڵ دەدەم خزمەت بەخەڵكی كوردستان بكەم."