تەندروستیی سلێمانى رایگەیاند؛ ژمارەى حاڵەتەكانی توشبون بە سکچون و
رشانەوە سێ هێندە زیادی کردوە، دەشڵێت: وشکەساڵى و پەنا بردنە بەر ئاوى بیر و سەرچاوەى
دیکەى ئاو هۆکارى بڵاوبونەوەى ئەو نەخۆشیەیە.
ئاوێنە: د. سەباح هەورامی بەڕێوەبەری گشتی تەندروستی سلێمانی لە کۆنگرەیەکی رۆژنامەوانیدا
رایگەیاند، حاڵەتەکانی توشبون بە سکچون و رشانەوە بەراورد بە رابردو سێ هێندە زیادیان
کردوە بۆیە ئەگەر کۆنتڕۆڵ نەکرێت مەترسی بڵاوبونەوەی نەخۆشی کۆلێرای لێدەکرێت.
وتیشی، زۆرترین حاڵەتەکانی توشبون بە سکچون و رشانەوە لە ناوچەکانی دەرەوەی
سەنتەری پارێزگای سلێمانی تۆمارکراون، داوامان لە رێکخراوە تەندروستی و جیهانییەکان
کردوە هاوکارمان بن لە پاراستنی هاوڵاتیان.
هەر لەو کۆنگرە رۆژنامەوانییەدا د. رزگار عەلی بەڕێوەبەری خۆپاراستنی تەندروستی
سلێمانی رایگەیاند، حاڵەتەکانی توشبون بە
سکچون و رشانەوە بەجۆرێک زیادی کردوە ئەگەڕ لە رابردودا رۆژانە (200) حاڵەت تۆمارکرابێت
ئێستا ژمارەکە بەزربوەتەوە بۆ (800) حاڵەت.
وتیشی"پێوستە هاوڵاتیان دوربکەونەوە لە بەکارهێنانی ئاوی چەم و روبارەکان
و ئاوی شیاو بۆ خواردنەوە بەکاربهێنن لە رۆژانى داهاتوشدا رێژەى کلۆر لەئاوى
خواردنەوەدا بەرزدەکەینەوە."
بەڕێوەبەری خۆپاراستنی تەندروستی سلێمانی وتیشی: ئەگەر حاڵەتەکان بەو شێوەیە
بەرز ببنەوە ناچار دەبن بە قەدەغەکردنی سەوزەو میوەو گرتنەبەری رێکاری خۆپارێزی
توند.