بڕیاردەری فراکسیۆنی یەکێتی لە پەرلەمانی عێراق دەڵێت: "ئەگەر زۆرە پارتی و یەکێتی لەسەر كاندیدی سەرۆک کۆمار رێکبکەون." جەختیش دەكاتەوە كە تا ئێستا بەرهەم ساڵح، كاندیدی رەسمی یەكێتییە بۆ پۆستەكە.

 ئاوێنە: کاروان یاروەیس، بڕیاردەری فراکسیۆنی یەکێتی لە پەرلەمانی عێراق، لەبارەی هەوڵەکان بۆ پێکهێنانی حکومەت، بڕیاردەری فراکسیۆنی یەکێتی لە پەرلەمانی عێراق بە روداوی راگەیاند"چوارچێوەی هەماهەنگی و لایەنەکانی دیکەی پەرلەمان لە دانوستاندان بۆ رێککەوتن لەسەر چۆنێتیی پێکهێنانی حکومەت و هەموو ئەگەرەکان بەرەو پێکهێنانی حکومەتێک دەچن کە لەسەر بنەمای سازانی نیشتمانی بێت".

 بەوتەی کاروان یاروەیس: "چوارچێوەی هەماهەنگی بە یەکێتی و پارتییان راگەیاندووە کە دەبێت هەوڵبدەن لەسەر یەک كاندید بۆ پۆستی سەرۆک کۆمار رێکبکەون و ئەگەریش بۆ ئەم مەبەستە رێکناکەون، وەک ساڵی 2018 هەر لایەنە و كاندیدی خۆی بهێنێتە پەرلەمان و بە دەنگدان هەڵبژاردنی سەرۆک کۆمار یەکلابکرێتەوە".

 لەبارەی ئەگەری لابردنی بەرهەم ساڵح وەک كاندیدی حیزبەکەی بۆ پۆستی سەرۆک کۆمار، کاروان یاروەیس وتی: "تائێستا كاندیدی رەسمی یەکێتیی نیشتمانیی کوردستان د. بەرهەم ساڵحە، بەڵام ئایا گفتوگۆکانی نێوان پارتی و یەکێتی ئەگەری دیکە دروستدەکات، تائێستا دیار نییە."