محەمەد حاجی مەحمود ناوەڕۆكی كۆبونەوەكەی ئەمڕۆی بافڵ تاڵەبانی و سەركردەكانی لایەنەكان ئاشكرادەكات
  2022-11-24       445       

محەمەد حاجی مەحمود، سكرتێری پارتی سۆسیال دیموكراتی كوردستان ئاشكرایكرد، لە كۆبونەوەی ئەمڕۆی نێوان بافڵ تاڵەبانی، سەرۆكی یەكێتی و سەركردەكانی لایەنەكانی دیكە كە بەبێ بەشداری پارتی بەڕێوەچو، پێشنیاری دروستكردنی ئەنجومەنێكی سیاسی لە هەرێمی كوردستان كراوە.

ئاوێنە: ئەمڕۆ پێنجشەممە، لەدوای كۆتاییهاتنی كۆبونەوەكە، محەمەد حاجی مەحمود لە لێدوانێكدا بۆ رۆژنامەنوسان رایگەیاند، لە كۆبونەوەكەدا باسی یەكخستنی ماڵی كوردستانی، چارەسەركردنی كێشەكانی هەرێم و بەغدا، چارەسەریی ئەو كێشانەی لە ناوچەكە هەیە، بۆردومانەكانی سەر هەرێم، چارەسەركردنی كێشەكانی نێوان پارتی و یەكێتی و هەمو هێزە سیاسییەكان، تاوتوێ كرا.

ئاماژەی بەوەشدا، هەروەها لە كۆبونەوەكەدا پێشنیاری ئەوە كرا كە بەهەوڵی هەمو لایەنەكان، ئەنجومەنێكی سیاسی لە هەرێم دروست بكرێت و سەرپەرشتیكردنی ئەنجومەنەكەش بەشێوەی دەوری بێت.

لەبارەی گرنگی كۆبونەوەكە، سكرتێری پارتی سۆسیال دیموكراتی كوردستان وتی، هەمو كۆبونەوەو یەك بینین و گۆڕینەوەی بیروڕایەك گرنگە، بەڵام پێویستە هەمو لایەنە سیاسییەكان بەتایبەتی یەكێتی و پارتی تێدابێت.

زۆرترین بینراو
© 2022 Awene Online, Inc. All Rights Reserved.
×