سەرۆک وەزیرانى عێراق رایدەگەیەنێت؛ رێککەوتن لەسەر پڕۆژەیاساى بودجەى 2023 کرا، دەشڵێت: پڕۆژەکە کلیلى چارەسەرى کێشەکانى عێراقە.
ئاوێنە: لە وتارەکەیدا کە لەدیداری سلێمانى پێشکەشى کرد، محەمەد شیاع سودانى رایگەیاند: کابینەى نوێی حکومەت بەشێک لە کارنامەکانى جێبەجێ کراوە و بەڵێنى چاکسازیش بە هاوڵاتییان دەدەین.
هەروەک جەخت دەکاتەوە لەوەى کە بەهێزى هەرێمى کوردستان سەلمێنەرى بەهێزى عێراقە و دەڵێت: رێگە نادەین خاکى عێراق بۆ بەئامانجگرتنى وڵاتان بەکاربێت و عێراق رێز لە سەروەرى خاکەکەى دەگرێت.
باسى لەوەشکرد کە لەگەڵ شاندى هەرێمى کوردستان گفتوگۆیەکى بەرهەمدارییان کردوە و ئاماژەى بەوەکرد کە لەگەڵ هەرێمى کوردستان یاساى نەوت و غاز دەردەکەن و جەختیش دەکاتەوە لەوەى کە پێویستە واز لە وشەى کێشە هەڵپەسێردراوەکان بهێنرێت.
سەرۆک وەزیرانى عێراق وتیشى'" بەبێ بیرکردنەوە رازیبوین لەسەر ناساندى هەڵەبجە وەک 19ـەمین پارێزگاى عێراق و بەپارێزگابونى هەڵەبجە بچوکترین پێزانینە بۆ قوربانییەکانى ئەو شارە".